Vöruskortur yfirvofandi hjá Nike og Costco

Kjartan Kjartansson skrifar 25. september 2021 07:55

Frá verslun Costco á Íslandi. Vísir/Hanna

Bandarísku stórfyrirtækin Nike og Costco vara við því að þau standi frammi fyrir vöruskorti og töfum vegna raskana á framleiðslu í verksmiðjum í Asíu. Costco segist ætla að taka upp takmarkanir á hversu mikið af ákveðnum vörum viðskiptavinir geta keypt.

Mikill vöxtur í eftirspurn eftir innfluttum vörum frá því að hjól efnahagslífsins byrjuðu að snúast aftur eftir að ströngustu sóttvarnaaðgerðum vegna kórónuveirufaraldursins var aflétt hefur verið höfuðverkur fyrir mörg smásölufyrirtæki. Framleiðsla er enn ekki kominn á fullan snúning og enn er erfiðleikum bundið að flytja vörur á milli heimsálfa.

Íþróttavörurisinn Nike lækkaði söluspá sína fyrir þetta ár vegna raskana. Sóttvarnaaðgerðir í Víetnam og Indónesíu hafa hægt verulega á framleiðslu verksmiðja Nike og þá tekur það nú tvöfalt lengri tíma en áður en flytja vörur á milli Asíu og Norður-Ameríku. Flutningstíminn hefur einnig lengst í Evrópu, Miðausturlöndum og Afríku, að sögn breska ríkisútvarpsins BBC.

Fyrirtækið varar við því að skortur verði líklega á skóm þar til næsta vor og að hans verði vart í öllum heimshornum.

Á sama tíma segir verslanakeðjan Costco að hún ætli að takmarka hversu mikið af ákveðnum vörum eins og klósettpappír, flöskuvatni og ákveðnum hreingerningarvörum viðskiptavinir kaupa. Ástæðan er sú að viðskiptavinir hafa aftur byrjað að hamstra vörur líkt og gerðist fyrr í faraldrinum en einnig vegna erfiðleika við að koma vörum í verslanir.

Costco segist eiga erfitt með að finna vöruflutningabíla, bílstjóra og vörugáma til að flytja vörur sínar.

Costco Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.