Hörmungar Brooklyn Nets liðsins halda áfram

Kyrie Irving og James Harden náðu ekki að skora tuttugu stig samanlagt þegar Brooklyn Nets tapaði 112-101 á útivelli á móti Sacramento Kings en Irving skoraði 14 stig og Harden var bara með 4 stig. Þetta var sjötta tap Brooklyn liðsins í röð.

Harden spilaði í 37 mínútur og átti 12 stoðsendingar en hann hitti aðeins úr 2 af 11 skotum, klikkaði á öllum fimm þriggja stiga skotum sínum, fékk ekki eitt víti og tapaði sex boltum. Irving hitti úr 5 af 15 skotum sínum. Nic Claxton var atkvæðamestur í Nets liðinu með 23 stig og 11 fráköst.

Harrison Barnes skoraði 19 stig fyrir Sacramento og þeir Davion Mitchell og Buddy Hield voru báðir með átján stig. Kings liðið var búið að tapa sjö leikjum í röð fyrir leikinn.

Anthony Davis var með 30 stig og 15 fráköst og Carmelo Anthony kom með 24 stig og fimm þristar úr sex skotum af bekknum þegar Los Angeles Lakers vann 99-94 sigur á Portland Trail Blazers. Lakers menn voru búnir að tapa þremur leikjum í röð fyrir leikinn.

Russell Westbrook vantaði bara eitt stig til að ná þrenunni en hann endaði leikinn með 13 stoðsendingar, 10 fráköst og 9 stig. LeBron James missti af leiknum eins og hinum á undan vegna meiðsla á hné. Norman Powell skoraði 30 stig fyrir Portland.

Luka Doncic skoraði 40 stig og gaf 10 stoðsendingar en það dugði ekki Dallas Mavericks liðinu sem tapaði 120-114 í framlengingu á heimavelli á móti liði Oklahoma City Thunder. Þetta er í fyrsta sinn síðan í desember sem Dallas tapar tveimur leikjum í röð.

Lu Dort skoraði 30 stig fyrir Thunder þar af 14 stig í röð í framlengingunni. Nýliðinn Tre Mann var með 29 stig og þeir Josh Giddey (14 stig og 10 stoðsendingar) og Darius Bazley (13 stig og 11 stoðsendingar) voru báðir með tvennu af bekknum í þessum öðrum sigir liðsins í röð.

Spencer Dinwiddie og Kyle Kuzma voru mennirnir á bak við það að Washington Wizards tókst að enda sex leikja taphrinu sína með óvæntum 106-103 útisigri á Philadelphia 76ers.

Dinwiddie skoraði körfuna sem kom Wizards yfir í lokin auk þess að vera með þrennu (14 stig, 12 fráköst og 10 stoðsendingar) og Kuzma var með 24 stig og varði skot frá Joel Embiid á mikilvægum tímapunkti í lokin. Embiid var með 27 stig og 14 fráköst fyrir 76ers en það nægði ekki til að lengja fimm leikja sigurgöngu liðsins.

Marcus Smart skoraði 22 stig og Jaylen Brown var með 15 stig þegar Boston Celtics vann 113-107 sigur á Charlotte Hornets en þetta var þriðji sigur Celtics liðsins í röð. LaMelo Ball skoraði 38 stig fyrir Charlotte en það dugði ekki til og liðið hefur nú tapað fjórum af síðustu sex leikjum sínum.

Houston Rockets endaði ellefu leikja taphrinu á heimavelli með 115-104 sigri á Cleveland Cavaliers en þetta var fyrsti sigur liðsins í Houston síðan 8. desember. Christian Wood og nýliðinn Jalen Green skoruðu báðir 21 stig.

Lögmál leiksins er vikulegur þáttur um NBA-deildina sem er sýndur á mánudögum á Stöð 2 Sport 2. NBA-deildin er hluti af Sport Erlent sem kostar kr. 3.990 á mánuði. Smelltu hér til að kaupa áskrift.