„Stöndum öll saman þegar það kemur að stóru stundinni“

Hljómsveitin kallar sig Systur í keppninni. Systkinin eru búin að vera í hljóðveri undanfarið og munu gefa út nýtt efni í sumar. Við tókum púlsinn á þeim Elínu, Siggu, Betu og Eyþóri, en þau keppa á fyrra undankvöldi Eurovision þriðjudaginn 10. maí.

Hvernig ertu stemmd/stemmdur fyrir keppninni?

Sigga: Bara vel. Ég veit ekki almennilega hvað ég er að fara út í en ég veit að það verður geggjað.

Beta: Ég er mega peppuð!

Eyþór: Ótrúlega spenntur og þá sérstaklega í ljósi þess að ég fæ að deila sviðinu með yndislegu systrum mínum.

Elín: Ég er rosa vel stemmd, við erum búin að fá góðan tíma til þess að melta þetta allt saman og kynna okkur vel hvað framundan er. Ég er eiginlega bara orðin mjög spennt!

Hvernig hafa síðustu mánuðir gengið?

Sigga: Bara mjög vel. Mikið að gera, margt nýtt en það hefur gengið ótrúlega vel enda ekkert nema frábært fólk sem við erum að vinna með

Beta: Rosalega vel. Þetta er mikil vinna en mjög skemmtileg vinna!

Eyþór: Rosalega vel. Ég eignaðist mitt fyrsta barn og það að vera að undirbúa fyrir Eurovision á sama tíma og að taka á móti nýju lífi er skrítið en það hefur gengið mjög vel upp meðal annars af því að systur mínar og fjölskylda eru til staðar fyrir okkur.

Elín: Þeir hafa gengið vel, þetta er búið að vera svaka ferðalag og mikið ævintýri og mikill lærdómur í þessu öllu saman.

Hvað hefur komið mest á óvart í undirbúningsferlinu?

Sigga: Hversu mikil vinna það er að fara í Eurovision, hversu stórt og mikið þetta ferli er og hversu margir eru ótrúlega miklir Eurovision aðdáendur og vita allt um Eurovision keppnina. Þetta er svo miklu stærra en ég bjóst við

Beta: Hvað þessi Eurovision heimur er stór! Svo ótrúlega áhugavert og gaman að fá að læra inn á þennan skemmtilega heim.

Eyþór: Kanski bara að kynnast þessum töfraheimi sem Eurovsion er - þetta er náttúrulega bara huge!

Elín: Hvað það er búið að vera brjálað að gera. Mér líður eins og ég hafi eiginlega ekki vitað hvað brjálað að gera þýddi fyrr en nú og svo líka hvað Eurovision keppnin á marga digga aðdáendur. Þetta er heimur sem ég vissi ekki af og ég elska hann!

Hafði umræðan um einvígið einhver áhrif á andann í hópnum?

Sigga: Já í byrjun. Ég tók því svolítið nærri mér fyrst. Maður vill auðvitað að allir séu sáttir og styðji við það sem við erum að gera fyrir Íslands hönd, en það er auðvitað óraunhæf krafa. Ég ber fulla virðingu fyrir því að fólk hafi ólíkan smekk og skoðanir.

Beta: Nei alls ekki. Allir verða að fá að hafa sína skoðun og maður verður bara að passa að taka því ekki persónulega. Við elskum Reykjavíkurdætur og alla sem voru að keppa með okkur og hefðum svo sannarlega viljað sjá alla fara út til Ítalíu!

Eyþór: Við leyfum ekki neikvæðum ummælum að hafa áhrif á okkur og viljum bara gefa frá okkur ást og góða orku.

Elín: Já hún gerði það alveg aðeins. Ég ætla ekki að ljúga, þetta var óþægilegt. En það gekk yfir fljótt því við höfum auðvitað ekkert með þetta að gera annað en að hafa stigið þarna á svið og gert okkar besta.

Hverju ertu spenntust/spenntastur fyrir úti?

Sigga: Fyrir utan að keppa í Eurovision þá er ég spenntust að vera með yndislegu systkinum mínum og öllu frábæra fólkinu sem verður með okkur úti. Það er svo ótrúlega gaman hjá okkur og hópurinn er svo náinn

Beta: Að vera með systkinum mínum og öllum snillingunum sem við erum að fara með út til Ítalíu!

Eyþór: Samverunni með yndislegu fólki í fallegu landi.

Elín:  Hlátursköstunum sem að ég veit að eru framundan með systkinum mínum og öllu góða fólkinu sem þarna verður.

Hvernig myndir þú lýsa stílnum þínum í lokaatriðinu úti?

Sigga: Svona 70’s americana með smá glamour

Beta: Ég myndi segja glamúr 70´s.

Elín: Hann er mjög innblásinn af Jimi Hendrix.

Verða einhverjar breytingar frá atriðinu ykkar á lokakvöldinu heima?

Sigga: Já búningarnir eru nýir, það er búið að gera smá breyting á laginu og svo bara svona almenn fínpússun

Beta: Það verða smá breytingar en mjög mínimalískar! Við munum ekki koma fljúgandi inn á svið eða neitt þannig, en við erum búin að fínpússa atriðið með snillingunum Unni Elísabeti Gunnarsdóttur og Salóme Þorkelsdóttur.

Elín: Ég er að reyna fá það í gegn að við komum fljúgandi inná svið en það gengur ekki vel.

Eitthvað sem mun koma íslensku þjóðinni á óvart í atriðinu?

Sigga: Ég veit það ekki, örugglega eitthvað.

Eyþór:  Kannski, kannski ekki - en mest líklega verður eitthvað nýtt sem verður svo örugglega kanski ekki.

Elín: Vonandi það að við komum fljúgandi inná svið.

Hvað hefur verið mesta áskorunin?

Sigga: Að vera mikið í burtu frá börnunum mínum og fjölskyldu og að taka ekki óuppbyggilegu gagnrýninni of nærri mér. Það er stundum skotið ansi hart. En ég reyni að passa mig að hafa gaman, njóta mín og vera þakklát fyrir þetta stórkostlega ævintýri.

Beta: Sko ég er allavegana búin að læra það að þegar það er svona mikið að gera þá er mjög mikilvægt að skipuleggja sig vel! Ég þarf klárlega að læra að skipuleggja mig aðeins betur.

Eyþór: Fyrir mig er erfiðast að þurfa að fara í burtu frá konunni minni og nýburanum okkar í hálfan mánuð - en þau munu fylgjast með og það verður gott að koma heim til þeirra eftir þetta magnaða ferli.

Elín: Að vera svona mikið upptekin og hafa ekki allan þann tíma sem ég myndi vilja með syni mínum og fólkinu mínu.

Hvernig komiði ykkur vanalega í gírinn áður en þið farið á svið?

Sigga: Með því að kjarna okkur, jarðbinda okkur, hugleiða og hreyfa okkur. Hvetja hvort annað og minna okkur á að við séum saman í þessu. Dansa og syngja saman og hlægja mikið…

Beta: Við knúsumst og peppum okkur með kærleika og þakklæti.

Eyþór: Við erum svo ótrúlega náin og við styrkjum hvort annað og stöndum öll saman þegar það kemur að stóru stundinni.

Elín: Við tökum utan um hvert annað og förum með einhverjar vel valdar möntrur.

Hvaðan sækirðu innblástur í tónlistinni?

Sigga: Náttúruna, lífsreynslu, sorgina, gleðina, óttann, hversdagsleikann. Hjá öðru tónlistarfólki, úr kvikmyndum, fréttum og fleira.

Beta: Mér finnst öll falleg tónlist vera mér innblástur. Ég fæ mikinn innblástur þegar ég heyri fallegar radd og strengja útsetningar! Mér finnst rosalega gaman að útsetja raddir og strengi.

Eyþór: Hjá mömmu og pabba og þeim sem gefa mér gæsahúð.

Elín: Lífinu og öllu sem því fylgir.

Eruð þið opin fyrir því að fara á tónleikaferðalag eftir keppni?

Sigga: Við erum svo sannarlega opin fyrir því. Við elskum fátt meira en að syngja, spila og ferðast saman.

Beta: Við erum að gera plötu og stefnum á að gefa út tónlist mjög fljótlega! Við erum ótrúlega spennt að halda áfram að semja, syngja og spila því að það er svo sannarlega það sem við elskum einna mest!

Eyþór: Við erum spennt að sjá hvað kemur næst og ætlum að sameina krafta til að semja og flytja eitthvað magnað.

Elín: Absalút! Þurfum bara að fá barnapíu með svo börnin geti verið með. Mamma og pabbi? Eru þið laus?