Noregur úr leik á EM

Austurríki fer áfram í 8-liða úrslit á EM í fótbolta eftir 1-0 sigur á Noregi. Þær norsku eru næst sigursælasta lið Evrópumótsins á eftir Þýskalandi en komast ekki upp úr riðli sínum, annað Evrópumótið í röð.

Austurríki skoraði frysta mark leiksins og var þar að verki Nicole Billa sem kom knettinum í netið eftir stórglæsilega sendingu Verena Hanshaw á 37. mínútu og þær austurísku leiddu með einu marki í hálfleik.

Noregi gekk illa að skapa sér almennileg færi þangað til alveg undir lok leiksins en á 89. mínútu fengu þær fínt tækifæri til að jafna leikinn þegar Celin Bizet á fast skot innan í vítateig Austurríkis og boltinn virtist vera á leið upp í fjærhornið en Manuela Zinsberger, markvörður Austurríkis, náði að slá hönd í boltann.

Einungis þrem mínútum síðar var norski markahrókurinn Ada Hegerberg í ákjósanlegu færi en aftur varði Zinsberger af stuttu færi.

Austurríki fer því áfram í 8-liða úrslitin eftir 1-0 sigur og fögnuðu þær gífurlega eftir leikslok. Austurríki endar A-riðil í öðru sæti með sex stig en Noregur er á heimleið eftir að hafa einungis náð í einn sigur á mótinu. Austurríki mun mæta Þjóðverjum í 8-liða úrslitum fimmtudaginn 21. júlí.