Don´t Worry Darling dramað rakið: Harry Styles, meintur hráki, „Miss Flo“ og Shia LaBeouf

Olivia Wilde leikstýrir myndinni

Olivia Wilde byrjaði ung að starfa sem leikkona og ferillinn hennar fór almennilega af stað árið 2004 þegar hún fór með hlutverk Alex í þáttunum The O.C. Síðan þá hefur tekið þátt í mörgum verkefnum í gegnum árin en það var svo árið 2019 sem hún leikstýrði sinni fyrstu kvikmynd, Booksmart.

Don't Worry Darling er því hennar önnur mynd í leikstjórastólnum og er hún nú þegar komin af stað í framleiðslu á tveimur framtíðarverkefnum.

Shia LaBeouf ekki lengur í myndinni

Í upphafi framleiðslu myndarinnar, í apríl 2020, lá það fyrir að Shia Labeouf og Florence Pugh áttu að fara með aðalhlutverk myndarinnar. Shia hefur verið gagnrýndur í sínu persónulega lífi í gegnum tíðina. Það var svo í september árið 2020 sem það var tilkynnt að annar leikari væri að taka við hlutverki Shia. 

Harry Styles ráðinn í staðinn

Tónlistarmaðurinn, leikarinn og hjartaknúsarinn Harry Styles var ráðinn í hlutverkið. Í kjölfarið myndaðist spenningur fyrir kvikmyndinni á meðal aðdáenda hans en þá hafði hann meðal annars leikið í kvikmyndinni Dunkirk.

Olivia skilur við Jason Sudeikis og byrjar með Harry Styles

Parið Olivia Wilde og Jason Sudeikis byrjaði saman árið 2011 og eiga saman tvö börn. Þau voru trúlofuð í sjö ár en í nóvember 2020 tilkynntu þau um áform sín um að halda í sitthvora áttina og hætta saman. 

Jason hefur síðan þá tjáð sig í viðtali við GQ að hann muni vonandi skilja betur hvað átti sér stað með tímanum því hann hafi komið af fjöllum.

Tveimur mánuðum síðar, í janúar 2021, var Harry boðið í brúðkaup Jeffrey Azoff sem er umboðsmaður hans. Þar gaf hann saman umboðsmanninn og eiginkonu hans Glenne Christiaansen. Aðeins sextán voru viðstaddir brúðkaupið vegna Covid en samt sem áður fékk Styles að bjóða Oliviu Wilde með sér og sáust þau leiðast.

Jason stefnir Oliviu uppi á sviði

Dágóð pása var á viðburðum tengdum myndinni. Það var svo í apríl á þessu ári sem Olivia Wilde var uppi á sviði á CinemaCon að kynna myndina, þegar kona gekk upp að sviðinu með umslag í hendinni og rennir því til hennar. 

Umslagið var merkt „persónulegt og trúnaðarupplýsingar.“ Olivia ákvað að opna það á sviðinu eftir að hafa sagt við áhorfendurna að þetta væri mjög dularfullt og hún héldi að um einhvers konar handrit væri að ræða.

Hún opnaði umslagið þar sem hún stóð fyrir framan fullan sal af fólki og sagði svo í kjölfarið „Allt í góðu, náði þessu, takk fyrir.“ Næst lokaði hún svo umslaginu og hélt áfram með kynninguna og voru áhorfendur eitt stórt spurningamerki samkvæmt þeim sem voru í salnum.

Olivia sagðist hafa rekið Shia LaBeouf

Nýlega kom Olivia fram í viðtali við Variety og sagði hann hafi verið rekinn vegna þess að hann byggi yfir „árásargjarnri orku.“ Hún sagði einnig að hún hafi viljað að leikkonunni Florence Pugh liði öruggri og vel á tökustað. Hún óskaði LaBeouf „heilsu og þróunar“ í framtíðinni og bætti við:

„Ferlið hans var ekki til þess fallið að stuðla að því andrúmslofti sem ég krefst í framleiðslu minni. Hann fer eftir ferlum sem að sumu leyti virðast krefjast „árásargjarnar orku“ og ég persónulega trúi því ekki að það stuðli að bestu frammistöðunni,“ er haft eftir Oliviu.

„Ég tel það að skapa öruggt og traust umhverfi sé besta leiðin til að fá fólk til að skila sinni bestu vinnu. Á endanum er það ábyrgð mín, gagnvart teyminu og leikarahópnum að vernda þau. Það var starf mitt,“ sagði hún einnig í viðtalinu við Variety.

Shia LaBeouf ósáttur og vildi sannleikann

Í kjölfar viðtals Oliviu við Variety, þar sem hún segist hafa rekið hann, fannst Shia hann knúinn til þess að tjá sig um málið.„Brottreksturinn átti sér aldrei stað, Olivia," sagði Shia LaBeouf meðal annars í bréfi, sem hann sendi til hennar og deildi að lokum með Variety til birtingar. Í því segist hann sjálfur hafa hætt í verkefninu og bætti við:

„Þó að ég skilji það fullkomlega hversu aðlaðandi það er að ýta undir þá sögu vegna núverandi landslags í samfélaginu, félagslega gjaldmiðilsins sem það hefur í för með sér. Þá er það er ekki sannleikurinn. Þannig að ég bið þig auðmjúklega, sem einstaklingur sem er að reyna að gera hlutina rétta, að þú leiðréttir frásögnina eins vel og þú getur,“ sagði hann.

Bað hann að koma til baka eftir að hann hætti

Í kjölfar þessarar yfirlýsingar Shia, sem Olivia virðist ekki hafa svarað, var myndbandi af henni lekið á netið. Virðist sem myndbandið sé myndbandsskilaboð sem hún sendi til leikarans.Þar má heyra hana reyna að sannfæra hann um að koma aftur inn í verkefnið. Í myndbandinu heyrist hún einnig tala um aðalleikkonu myndarinnar Florence Pugh og lýsir henni sem hluta af vandamálinu.

„Mér líður eins og ég sé ekki tilbúin til að gefast upp á þessu ennþá, og ég er með brotið hjarta og mig langar að finna lausn þessu. Veistu, ég held að þetta gæti verið smá uppvakning fyrir ungfrú Flo,“ sagði hún um aðalleikonuna. 

„Ég vil vita hvort þú sért opinn fyrir því að gefa þessu tækifæri með mér, með okkur. Ef hún skuldbindur sig virkilega, ef hún leggur hug sinn og hjarta í verkefnið á þessum tímapunkti og ef þið getið samið um frið. Ég virði þitt sjónarmið, og ég virði hennar. Ef þið getið gert það, hvað finnst ykkur? Er von? Er von? Viltu láta mig vita?"

Ósætti milli Oliviu Wilde og Florence Pugh

Eftir að myndbandið lak af Oliviu að tala um Florence, þar sem hún var að reyna að fá leikarann Shia aftur í hlutverkið, fóru sögusagnir af ósætti á milli Oliviu og Florence á kreik.

Florence ákvað að mæta ekki á fjölmiðlaviðburðinn í gær heldur aðeins labba rauða dregilinn í Feneyjum, þar sem hún mætti með ömmu sína sér við hlið. Stílistinn hennar, Rebecca Corbin-Murray, setti inn mynd af henni fyrir viðburðinn með textanum: Miss Flo. Þar vitnar hún líklega í upptökuna af Oliviu þar sem hún kallaði hana Miss Flo.

Olivia mætti og aftur á móti og svaraði spurningum blaðamanna fyrir sýninguna. Þar bannaði hún spurningar um Shia LaBeouf. 

Olivia sagði ósættið vera slúður

Hún svaraði þó spurningum um meint ósætti hennar og Florence Pugh eftir að upptakan lak og var beðin um að hreinsa loftið. Þá byrjaði hún á því að segja að Florence væri mikið afl (e. force) og bætti við: „Hvað varðar allt endalausa slúðrið og allan hávaðann þarna úti, ég meina, internetið nærir sig sjálft,“ sagði Olivia. „Mér finnst ég ekki þurfa að leggja mitt af mörkum. Það er nægilega vel nært.“

Leikstjórinn sagði það einnig alltaf hafi staðið til að Florence myndi ekki mæta á blaðamannafundinn því hún væri bundin í öðru verkefni. Á sama tíma var myndbandi deilt af Florence í Feneyjum, þar sem viðburðurinn fór fram, með kokteil. 

Harry Styles virtist hrækja á Chris Pine

Í myndbandi frá frumsýningu myndarinnar í gær, eftir blaðamannaviðburðinn, virtist Harry Styles hrækja á samleikara sinn Chris Pine. Óljóst er hvað átti að hafa valdið því en myndbandið vakti mikið umtal, meðal annars á miðlinum Twitter.

Harry Styles kyssti Nick Kroll á munninn

Þegar sýningu á myndinni í gær var lokið og heljarinnar fjögurra mínútna uppklapp var í í salnum gerði Harry Styles sér lítið fyrir og smellti einum kossi beint á munninn á leikaranum Nick Kroll líkt og sjá má á myndböndum frá viðburðinum.

Netverjar óskuðu eftir svörum

Á Twitter hafa leitarorðin „Don't Worry Darling" verið vinsæl í dag. Netverjar virðast vera eitt stórt spurningamerki eftir atburði gærdagsins, og síðustu mánaða í heild sinni. Sumir telja jafnvel að um samsæri eða stórkostlega markaðssetningu sé að ræða. 

Stjörnurnar byrjaðar að tjá sig

Talsmaður Chris Pine hefur nú tjáð sig um atvikið við People og segir Harry ekki hafa hrækt á leikarann. „Það er ekkert nema virðing á milli þessara tveggja manna og allar uppástungur um annað eru tilraun til þess að búa til drama. sem einfaldlega er ekki til,“ sagði hann einnig. 

Tíminn mun eflaust leiða í ljós hvað talsmenn Florence, Harry, Shia og Oliviu hafa um málið að segja og hvort að það muni svara einhverjum spurningum.