Ísak Bergmann Jóhannesson, Hákon Arnar Haraldsson og félagar í danska meistaraliðinu FC Kaupmannahöfn sóttu sitt annað stig í G-riðli Meistaradeildar Evrópu þegar liðið gerði markalaust jafntefli gegn ógnarsterku liði Manchester City í kvöld.
Hákon Arnar Var í byrjunarliði FCK í kvöld, en var tekinn af velli eftir um klukkutíma leik fyrir félaga sinn frá Akranesi, Ísak Bergmann Jóhannesson.
Eins og við var að búast voru það gestirnir í Manchester City sem voru mun sterkari aðilinn í leiknum og Rodri virtist hafa komið liðinu í forystu strax á 11. mínútu leiksins, en markið dæmt af vegna brots í aðdraganda þess.
Gestirnir fengu svo vítaspyrnu eftir rúmlega tuttugu mínútna leik eftir að Nicolai Boilesen hendlék knöttinn innan vítateigs. Riyad Mahrez fór á punktinn fyrir gestina, en Kamil Grabara varði frá honum og staðan því enn markalaus.
Heimamenn í FCK fengu þó ágætis líflínu á 30. mínútu leiksins þegar Sergio Gomez braut á Hákoni Arnari þegar sá síðarnefndi var við það að sleppa í gegn og Gomez fékk að líta beint rautt spjald.
Manni færri tókst Englandsmeisturunum ekki að finna netmöskvana og niðurstaðan því markalaust jafntefli í þó nokkuð fjörugum leik. Íslendingalið FCK er því með tvö stig eftir fjóra leik í þriðja sæti G-riðils, átta stigum á eftir City sem trónir á toppi riðilsins með tíu stig.
Hvilken fight der blev leveret for øjnene af de 35.447 tilskuere på en flot aften i Parken. Og vores fight, som retfærdigvis var 11 mod 10, blev belønnet med det ene point, da ingen af mandskaberne scorede i løbet af de 90 minutter. #fckmci | #fcklive | #cldk pic.twitter.com/FzusEvWEYV
— F.C. København LIVE! (@FCKobenhavnLIVE) October 11, 2022
Þá er ítalska stórliðið Juventus í slæmum málum í H-riðli eftir að liðið mátti þola 2-0 tap gegn ísraelska liðinu Maccabi Haifa á útivelli í kvöld.
Bæði mörk leiksins voru skoruð í fyrri hálfleik og liðin eru því jöfn í þriðja til fjórða sæti riðilsins með þrjú stig, fjórum stigum á eftir PSG og Benfica sem mætast í kvöld.
