Ein­kunnir strákanna á móti Portúgal: Björg­vin fær sexuna og þrír með fimmu

Íslenska liðið lenti í smá vandræðum í fyrri hálfleik og þá sérstaklega í sóknarleiknum sem fæstir höfðu áhyggjur af. Vörnin og markvarslan var aftur á móti lengst af til mikillar fyrirmyndar.

Reynsluboltinn Björgvin Páll Gústavsson var frábær í íslenska markinu og fær fullt hús eða sexu. Gaman að sjá Björgvin byrja mótið svona vel.

Þrír leikmenn fengu fimmu. Ómar Ingi Magnússon fór fyrir sóknarleiknum allan leikinn, Elvar Örn Jónsson lék mjög vel í vörninni og Bjarki Már Elísson átti afbragðs seinni hálfleik eftir mörg mistök í þeim fyrri.

Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína. Björgvin Páll Gústavsson var besti leikmaður íslenska liðsins í kvöld að mati okkar.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Portúgal:

- Byrjunarlið Íslands í leiknum -

Björgvin Páll Gústavsson, mark - 6 (15 varin skot - 46:29 mín.) Heimsklassaframmistaða. Varði á mikilvægum augnablikum. Var pollrólegur jafnvel þótt menn væri að skjóta hann niður. Hefur sjaldan verið í betra formi og leikgleðin skín út úr andlitinu á honum. Hann nýtur þess að spila

Bjarki Már Elísson, vinstra horn - 5 (9/3 mörk - 48:52 mín.) Átti erfitt uppdráttar í fyrri hálfleik og gerði mikið af mistökum. Kom til baka í þeim síðari og átti frábæran dag. Fékk dýrar tvær mínútur á ögurstundu sem er ófyrirgefanlegt í leik þar sem allt er undir. Maður með stáltaugar.

Aron Pálmarsson, vinstri skytta - 2 (2 mörk - 53:20 mín.) Fyrirliðinn átti góða spretti í varnarleiknum en í sókninni var hann afleitur. Með afar slæma skotnýtingu, virkaði þungur og ekki í takti. Sem betur fer á hann mikið inn því mótið er bæði langt og strangt.

Gísli Þorgeir Kristjánsson, leikstjórnandi - 3 (2 mörk - 26:14 mín.) Byrjaði mjög vel en síðan fjaraði undan honum ekki síst í fyrri hálfleik. Fann betri takt í síðari hálfleik. Spurning hvort spennustigið hafi verið of hátt. Hefur verið á allra vörum í aðdraganda mótsins. Var hafinn upp til skýjanna. Gísli mun örugglega ná að simpla sig rækilega inn í næstu leikjum því við þurfum á því að halda.

Ómar Ingi Magnússon, hægri skytta - 5 (7/1 mörk - 60:00 mín.) Spilaði hverja einustu sekúndu í leiknum. Hefur yfirsýn sem enginn annar leikmaður í heiminum hefur. Skoraði mark á ögurstund og fiskaði víti. Ef einhver nafngiftina Íþróttamaður ársins með rentu þá er það Ómar Ingi Magnússon. Frábært eintak.

Sigvaldi Guðjónsson, hægra horn - 4 (4 mörk - 56:10 mín.) Átti mjög góðan leik. Nýtti öll skotin sín, var áræðinn og er hornamaður í allra fremstu röð. Ekki ónýtt að vita að við eigum mann á bekknum af sama kaliberi. Liðið er frábærlega mannað í þessari stöðu.

Ýmir Örn Gíslason, lína - 3 (0 mörk - 33:28 mín.) Hefur oft leikið betur. Var í vandræðum í hjarta varnarinnar en vinnusemin og dugnaðurinn fleytir honum langt. Kannski skemmir það fyrir honum að framan af var hann ekki að spila mikið í Þýskalandi og ef til vill skortir hann leikæfingu.

Elvar Örn Jónsson, vinstri skytta - 5 (9 stopp - 39:19 mín.) Var langbesti varnarmaður íslenska liðsins. Tapaði ekki einvígi. Mun án efa nýtast okkur betur sóknarlega þegar líða fer á mótið. Elvar hefur tekið stórstígum framförum eftir veru sína í Þýskalandi. Algjör lykilmaður í íslenska liðinu.

- Menn sem komu inn af bekknum í leiknum -

Elliði Snær Viðarsson, lína - 4 (4 mörk - 41:14 mín.) Elliði átti frábæran dag. Skoraði fjögur mörk og stóð vaktina vel í varnarleiknum eða eins og hann getur best. Það geislar af honum inn á vellinum og er í dag mun betri leikmaður en hann var á Evrópumótinu fyrir sléttu ári.

Viktor Gísli Hallgrímsson, mark - 3 (4/1 varin skot- 11:44 mín.) Kom inn í íslenska liðinu á ögurstundu og náði að verja vítakast sem var afar mikilvægt. Gott til þess að vita að hann mun án nokkurs vafa stíga upp. Við þurfum svo sannarlega á þessum efnilegasta markverði heims að halda í toppstandi.

Janus Daði Smárason, leikstjórnandi - spilaði of lítið

Arnar Freyr Arnarsson, vörn - spilaði ekki

Ólafur Guðmundsson, vinstri skytta - spilaði ekki

Viggó Kristjánsson, hægri skytta - spilaði ekki

Óðinn Þór Ríkharðsson, hægra horn - spilaði ekki

Hákon Daði Styrmisson, vinstra horn - spilaði ekki

Guðmundur Guðmundsson, þjálfari - 5 Hélt ró sinni allan leikinn. Reyndi að finna lausnir í sóknarleiknum þegar fjaraði undan liðinu. Varnarlega var íslenska liðið mun betra heldur en gegn Þýskalandi. Guðmundur heldur í íhaldsemina, spilaði á sínu átta manna liði en verður að passa sig á því að sprengja ekki lykilmenn eins og Ómar Inga. Ef fram heldur sem horfir eru margir leikir eftir á þessu heimsmeistaramóti.

Útskýring á einkunnum:

6 - Heimsklassa frammistaða

5 - Frábær frammistaða

4 - Góð frammistaða

3 - Sæmileg frammistaða - skilaði sínu

2 - Ekki nógu góð frammistaða

1 - Slakur leikur