Björk tilkynnir tónleikaröð í Reykjavík: Stærsta sýningin hingað til

„Mikilfengleg tónlistarupplifun“

Í fréttatilkynningu frá Senu segir að Björk bjóði gestum í mikilfenglega tónlistarupplifun í heimaborg sinni, Reykjavík, 7., 10. og 13. júní næstkomandi.

Í spilaranum hér að neðan má sjá tónlistarmyndband við lagið atopos sem er að finna á plötu Bjarkar, fossora:

„Cornucopia var alltaf hugsuð sem veröld fyrir bæði utopiu og plötuna eftir hana, sem er nú komin út og heitir fossora. Ég er því mjög spennt að frumsýna í sumar á íslandi og sjá þessa tvo heima sameinast,“ segir Björk.

Talrænt leikhús og framtíðarkenndur sýndarveruleiki

Sýningin er tvær klukkustundir á hefðbundnu sviði og flutt verður tónlist af plötum hennar Útópíu og Fossoru. Er um að ræða stærstu sýningu sem Björk hefur gert og verður einn mesti fjöldi talrænna leiktjalda sem hafa verið á einu sviði.

Hún kallar þetta talrænt leikhús (e. digital theatre), eða lanterna magica, þar sem áheyrendur eru umkringdir tugi talrænna skjáa með hljóðfæraleikara, kór, flautur, klarínett, slagverk og ótal mörgum sérsmíðuðum hljóðfærum.

„Laugardalshöll verður gjörbreytt og mun bjóða gestum í stórfenglegt landslag sem samanstendur af gróskumiklum litum, framtíðarkenndum sýndarveruleika og draumakenndri áferð náttúrunnar. 

Tónleikagestum gefst tækifæri til að sökkva sér í stórkostlega tónlistarupplifun þar sem náttúran og tæknin sameinast á töfrandi hátt,“ 

segir í fréttatilkynningu. Miðasala verður kynnt innan skamms.

Sýningin er framleidd af verðlaunuðum hópi listamanna og tæknimanna, þar sem stafræni heimurinn sameinast leikhúsheiminum undir stjórn Bjarkar. Sérstakir gestir verða meðlimir Hamrahlíðakórsins.