Greint er frá því í brasilískum miðlum að seglbátar hafi verið notaðir til þess að flytja efni yfir Atlantshafið. Fulltrúi lögreglunnar í Florianopolis, í fylkinu Santa Catarina þar sem mikið af aðgerðunum fór fram sagði að móttöku og sendingarstaðurinn í Brasilíu hafi verið í norð-austurhluta landsins. Efnin voru flutt milli Brasilíu og Evrópu, en einnig til og frá vesturströnd Afríku og Úrúgvæ.
„Þessi glæpasamtök eru afar sérkennileg þar sem þau selja alls kyns fíkniefni, bæði í stórum og smáum skömmtum,“ sagði fulltrúinn við miðilinn SBT. „Þau flytja inn og út hass, marijúana og kókaín.“
Gæti fengið 40 ára dóm
Eins og fram kom í hádeginu í gær var Sverrir, eða Sveddi Tönn eins og hann er gjarnan kallaður, handtekinn í borginni Rio de Janeiro um morguninn. Sverrir, sem fékk 22 ára fangelsisdóm árið 2012, er grunaður um að vera leiðtogi annars tveggja smyglhringja sem höfðu mesta starfsemi í borgunum Rio de Janeiro, Rio de Janeiro do Norte og Sao Paulo. Íslenska lögreglan tók þátt í rannsókninni. Á sama tíma var Ítalinn handtekinn í borginni Bahia.
Alls voru 33 handteknir í 6 fylkjum Brasilíu. Flestir í borginni Sao Pauo, eða 11 talsins. Þá voru gerðar húsleitir og haldlagningar á 49 stöðum í 9 fylkjum, þar af 13 í Sao Paulo. Alls tóku 250 lögreglumenn þátt í aðgerðunum.
Bankareikningar voru frystir hjá 43 einstaklingum og hald lagt á 57 húseignir, bifreiðar og báta. Einnig voru haldlögð 65 kílógrömm af kókaíni, 225 kíló af kannabisefnum, skartgripi og vopn.
Fyrir utan smygl á fíkniefnum eru Sverrir og aðrir sem handteknir voru grunaðir um peningaþvætti. Viðurlög eru allt að 40 ára fangelsi.
Tengsl við rótgrónar klíkur
Glæpahringirnir tveir eru einnig sagðir hafa tengsl við tvö rótgróin brasilísk glæpasamtök, Comando Vermelho og Primeiro Comando da Capital, eða PCC, sem bæði starfa bæði innan og utan fangelsismúra.
Comando Vermelho eru ein stærstu glæpasamtök Brasilíu og voru stofnuð árið 1979 í fangelsinu Candido Mendes á eyjunni Ilha Grande nálægt Rio de Janeiro. Upprunalega voru pólitískir fangar áberandi í samtökunum og fé var safnað til að bæta hag fanga og hjálpa þeim að flýja úr fangelsi. Á níunda áratugnum, þegar margir meðlimir voru komnir á götuna, einbeittu samtökin sér að bankaránum og ránum í skartgripaverslunum.
Fíkniefnaviðskipti urðu sífellt stærri hluti af starfsemi Comando Vermelho og í dag eru samtökin nokkuð hefðbundin glæpasamtök, með vopnuðum sveitum vígamanna, sem starfa innan og utan fangelsismúra.
PCC eru nýrri samtök, stofnuð árið 1993 í Sao Paulo, með 20 þúsund meðlimi. Þar af 6 þúsund innan fangelsismúra. PCC starfa einnig utan Brasilíu, í Perú, Venesúela, Síle, og fleiri löndum Suður Ameríku sem og í Bandaríkjunum.
Fíkniefnaviðskipti eru stór hluti af starfsemi PCC en einnig bankarán, hórmang, morð, mannrán og ýmsir aðrir glæpir.
Árið 2012 var eins konar stríð á milli lögreglunnar og PCC eftir að 6 meðlimir glæpasamtakanna voru drepnir í skotbardaga. PCC og lögreglan skiptist á árásum á hvor annan og í lok ársins höfðu 106 lögreglumenn fallið sem og 775 óbreyttir borgarar.
