Umfjöllun og myndir: Stjarnan - Valur 20-27 | Vals­konur í úr­slit í fimmta sinn í röð

Valur er kominn í úrslit Olís-deildar kvenna í handbolta í fimmta sinn í röð eftir sigur á Stjörnunni í Garðabænum í kvöld, 20-27. Valskonur unnu einvígið, 3-1, eftir að hafa tapað fyrsta leiknum á heimavelli. Valur mætir annað hvort ÍBV eða Haukum í úrslitum.

Eftir þrjá mikla spennuleiki í einvíginu var ekki mikil spurning hvorum megin sigurinn í þessum leik myndi enda. Valskonur voru alltaf með undirtökin og stungu svo af um miðjan seinni hálfleik.

Markvarslan hjá Val hafði verið misjöfn í einvíginu en hún var frábær í dag. Sara Sif Helgadóttir varði átján skot, eða 49 prósent þeirra skota sem hún fékk á sig.

Þórey Anna Ásgeirsdóttir var markahæst í liði Vals með tíu mörk. Thea Imani Sturludóttir skoraði fimm mörk en tíu leikmenn Vals komust á blað í dag.

Helena Rut Örvarsdóttir skoraði átta mörk fyrir Stjörnuna og Lena Margrét Valdimarsdóttir sex. Darija Zecevic varði þrettán skot (33 prósent).

Eins og svo oft áður í einvíginu byrjaði Valur betur og komst mest fjórum mörkum yfir. Sóknarleikur Stjörnunnar var mjög stirður, mest mæddi á Helenu en hún fékk litla hjálp frá samherjum sínum í útilínunni og boltinn barst sjaldan inn á línu og aldrei út í horn. Þá skoruðu Garðbæingar aðeins eitt mark eftir hraðaupphlaup í fyrri hálfleik.

Þrátt fyrir allt þetta og fjörutíu prósent markvörslu Söru náðu Valskonur aldrei að slíta sig frá Stjörnukonum og munurinn í hálfleik var aðeins þrjú mörk, 9-12. Þórey Anna var atkvæðamest í Valssókninni með fimm mörk en sjö leikmenn skiptu með sér hinum sjö mörkunum.

Stjarnan var áfram í sömu sóknarvandræðunum í upphafi seinni hálfleiks. Þær náðu hins vegar að höggva á hnútinn og eftir þrjú mörk í röð var staðan allt í einu 15-16.

Þá tók Ágúst Jóhannsson, þjálfari Vals, leikhlé sem gaf heldur betur góða raun. Valskonur skoruðu fjögur mörk í röð og komust fimm mörkum yfir, 15-20. Sá hjalli reyndist óyfirstíganlegur fyrir Stjörnuna.

Garðbæingar reyndu hvað þeir gátu og fjölguðu meðal annars í sókninni en ekkert gekk. Sara varði allt hvað af tók og munurinn jókst bara og jókst.

Síðustu tíu mínúturnar var svo aðeins spurning hversu stór sigurinn yrði. Á endanum munaði sjö mörkum á liðunum, 20-27, og Valur því kominn í úrslit, enn eitt árið.