Alltaf kaffi í rúmið og auðvitað í dúndurstuð með S.H.Draumi

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Á undan vekjaraklukkunni, ég vakna yfirleitt frekar snemma, enginn sérstakur tími en yfirleitt upp úr klukkan sex, en á það til að dorma til átta eða níu um helgar.“

Hvað er það fyrsta sem þú gerir á morgnana?

Fæ mér alltaf kaffi í rúmið. Við Guðbjörg reynum að skiptast á að sækja kaffi í rúmið en hún er frekar óþolinmóð og á ómögulegt með að liggja kyrr eftir að hún vaknar, þess vegna fer hún oftar að sækja kaffið heldur en ég. 

Svo tökum við morgunspjall og smá símatíma, ég kíki yfir fréttirnar, fer yfir skilaboð og tölvupósta og skipulegg daginn. 

Vek svo börnin rúmlega sjö ef Guðbjörg er ekki búin að því en við erum með tvö af fimm börnum okkar heima. Þau eru 11 og 15 ára sem sjá um sig að mestu sjálf á morgnana.“

Er eitthvað lag frá unglingsárunum, sem kemur þér enn þá alltaf í dúndurstuð?

„Það hlýtur að vera það sama og hjá flestum landsmönnum en það er lagið Mónakó með S.H.Draumi. Ef það kemur ekki blóðrásinni af stað þá veit ég ekki hvað það ætti að vera.“

Í hvaða verkefni ertu að vinna helst í þessa dagana?

„Ég er að brasa í ansi mörgu en það sem er helst á baugi þessa dagana eru verkefni tengd kjaramálunum. Erum að skipuleggja innra starf VR og koma því af stað eftir nýafstaðnar kosningar.

 Erum að undirbúa og hefja framkvæmdir á fyrstu íbúðunum Blævar, nýju húsnæðisfélagi ASÍ og BSRB, svo erum við í miðjum viðræðum um nýjan kjarasamning, ég er að undirbúa frekari mótmæli á Austurvelli og við Seðlabankann, við erum að koma nýrri miðstjórn ASÍ af stað og móta verkefnin sem framundan eru, ég er að mála unglingaherbergi, í bílaviðgerðum með elsta stráknum og fagna útskrift með þeim næstelsta, skipuleggja vorverkin heima, undirbúningur og æfingar fyrir upptökur á tveimur nýjum lögum með hljómsveitinni minni Fjöll.

Æfingar með gömlu hljómsveitinni minni Los sem er að koma saman aftur eftir 30 ár af sérstöku tilefni, svo er ég að reyna að komast í betra hjólaform fyrir Rynkeby fjáröflunarverkefnið í Júlí en við munum þá hjóla um 1.300km. leið frá Danmörku til Parísar á átta dögum, til styrktar Umhyggju styrktarfélags langveikra barna. Svo er ég alltaf að skrifa eitthvað og stúdera, og auðvitað finna eitthvað nýtt til að röfla yfir. Annars bara hangs þess á milli.“

Hvernig skipuleggur þú þig í vinnu?

„Ég hugsa mikið og pæli í hlutunum áður en ég framkvæmi, ég vil helst vera með á hreinu hvernig ég byrja og hvar ég enda áður en ég fer af stað. Það getur því tekið smá tíma að koma sér af stað í verkefnin en þá vinnast þau hratt og vel.

Ég gæti alveg lýst mér sem pínu skipulagt kaós á köflum, en ég er að eðlisfari mjög drífandi í öllu sem ég geri og er algjörlega óhræddur við að taka ákvarðanir og treysta innsæi mínu og þeirra sem standa mér næst.

Mér leiðist fátt meira þegar mikill tími fer í að taka einfaldar ákvarðanir.

Síðan heldur Guðbjörg eiginkona mín um skipulagið líka, hún er skipulagsnörd og hún heldur utan um öll plön, ráðstefnur og vinnufundi, frí og ferðir, marga mánuði fram í tímann. 

Það kemur fyrir að stjórnendur hjá okkur í VR hafi samband við Guðbjörgu frekar en mig til að kanna hvort við séum laus á tilteknum tímum. 

En við pössum fullkomlega saman hvað þetta varðar. Vegum hvort annað upp.“

Hvenær ferðu að sofa á kvöldin?

„Ég veit ekkert hvenær ég sofna nákvæmlega en það gæti verið að meðaltali klukkan ellefu-ish. En ég er hins vegar komin í háttinn klukkan tíu á kvöldin, jafnvel fyrr.“