Snarpur skjálfti að stærð 3,3 reið yfir um klukkan níu og fannst á höfuðborgarsvæðinu.
Samkvæmt óyfirförnum frummælingum Veðurstofunnar var skjálftinn 3,3 að stærð og mældist á fimm kílómetra dýpi.
Skjálftinn er sá fyrsti sem mælist yfir þrír að stærð frá því klukkan 14.45 í dag. Það er spurning hvort æsingur sé að færast aftur í leikinn eftir margra klukkustunda rólegheit.
Jarðfræðingar búast við áframhaldandi skjálftahrinu á Reykjanesi næstu daga. Upptök skjálftahrinunnar eru á milli Fagradalsfjalls og Keilis en landris hefur orðið á stóru svæði á nesinu.
Það dró heldur úr skjálftavirkni og skjálftastærð á Reykjanesskaga í nótt en alls mældust 750 skjálftar eftir miðnætti. Stærsti skjálfti dagsins var hins vegar 4,2 að stærð og reið yfir klukkan 11:03 í morgun.
