Sam­þ­ykkt­­u bráð­a­birð­ga­fjár­l­ög á síð­­ust­­u stund­­u

Kevin McCarthy, umræddur forseti, féll frá öllum kröfum um niðurskurð sem hópur fjar-hægri þingmanna hans hafði krafist og þurfti hann stuðning Demókrata til að koma frumvarpinu í gegnum fulltrúadeildina. Til þess þurfti hann að auka fjárútlát í sjóði til neyðaraðstoðar um sextán milljarða dala.

Frekari aðstoð til Úkraínu vegna innrásar Rússa var einnig tekin út úr frumvarpinu og McCarthy neitaði í nótt að segja hvort hann myndi leggja fram sérstakt frumvarp um þá aðstoð í millitíðinni. Sífellt stækkandi hópur þingmanna Repúblikanaflokksins virðist mótfallinn þessari aðstoð.

Fjárlagafrumvarpið var samþykkt með 335 atkvæðum gegn 91 í fulltrúadeildinni og með 88 atkvæðum gegn níu í öldungadeildinni. Joe Biden, forseti, skrifaði svo undir frumvarpið.

Lokun virtist óhjákvæmileg

Lokun opinberra stofnanna virtist óhjákvæmileg þar til í gærkvöldi, þar sem óreiða hefur ríkt í fulltrúadeildinni. Þá óreiðu má rekja til hóps fjar-hægri þingmanna Repúblikanaflokksins sem hafa krafist þess að fjárlögin innihaldi mikla niðurskurði hjá opinberum stofnunum og aðstoð til Úkraínu verði hætt.

Repúblikanar hafa mjög nauman meirihluta í fulltrúadeildinni og til að tryggja sér embætti þingforseta þurfti McCarthy að láta eftir ýmsum kröfum þessa hóps. Þar á meðal var sú krafa að breyta reglum þingsins svo einungis einn þingmaður geti kallað eftir atkvæðagreiðslu um vantraust á þingforseta.

Þessi hópur hafði eins og áður segir krafist mikils niðurskurðar, sem fer gegn samkomulagi sem McCarthy gerði við Biden fyrr á árinu.

Það samkomulag kom í veg fyrir það að Bandaríkin færu í greiðsluþrot í fyrsta sinn og fól í sér að ríkisútgjöld til stofnanna, annarra en herafla Bandaríkjanna, yrðu ekkert aukin á næsta ári og aðeins aukin um eitt prósent árið 2025.

McCarthy þarf líklega að verjast vantrauststillögu

Uppreisnarmennirnir höfðu gert ljós að ef McCarthy myndi koma fjárlagafrumvarpi gegnum þingið myndu þeir velta honum úr sessi. Fregnir höfðu borist af því á dögunum að uppreisnarmennirnir væru þegar byrjaðir að leita að einhverjum til að taka við af McCarthy og þá einhverjum sem væri líklegri til að hlusta á kröfur þeirra.

McCarthy mun að öllum líkindum standa frammi fyrir atkvæðagreiðslum um vantraust en óljóst er hvort meirihluti sé fyrir því inn þingflokks Repúblikanaflokksins að víkja honum úr embætti.

Níutíu þingmenn flokksins greiddu atkvæði gegn fjárlagafrumvarpinu í nótt en 222 Repúblikanar sitja á þingi, móti 212 Demókrötum.

„Ef einhver vill víkja mér úr embætti fyrir að vera sá fullorðni í herberginu, má hann reyna það,“ sagði McCarthy í nótt og sagðist hann hafa hugsað um Bandaríkin frekar en sæti sitt. Hann hafði einmitt verið gagnrýndur í aðdraganda gærkvöldsins fyrir það að hugsa frekar um embætti sitt en Bandaríkin.

Leiðtogar Repúblikanaflokksins höfðu lýst yfir áhyggjum yfir því að lokun opinberra stofnana myndi koma niður á flokknum í kosningum næsta árs. McCarthy átti fáa aðra kosti en að gera samkomulag við Demókrata eða loka opinberum stofnunum.

Demókratar mótmæltu upprunalega, samkvæmt frétt New York Times, en vildu ekki líta út fyrir að setja aðstoð til Úkraínu ofar lokun opinberra stofnana og þeim tæpu tveimur milljónum starfsmanna herafla bandaríkjanna og tveimur milljónum opinberra starfsmanna sem lokunin hefði haft áhrif á.

„Eru þið að segja mér að þið mynduð loka opinberum stofnunum án aðstoðar til Úkraínu?“ sagði Mike Lawler, þingmaður Repúblikanaflokksins í nótt.

Ætla að berast fyrir frekari aðstoð

Þó andstaða við stuðning til Úkraínu hafi aukist meðal Repúblikana í fulltrúadeildinni á það ekki við Repúblikana í öldungadeildinni. Mitch McConnell, leiðtogi Repúblikanaflokksins þar, segist ætla að berjast fyrir áframhaldandi aðstoð.

Nærri því helmingur þingmanna Repúblikanaflokksins í fulltrúadeildinni greiddi atkvæði með því að fjarlægja ákvæði í fjárlögum um 300 milljóna dala framlag til þjálfunar úkraínskra hermanna og kaupa vopn fyrir þá á dögunum.

Ákvæðið var þó fært í annað frumvarp og samþykkt skömmu síðar, eins og fram kemur í frétt AP fréttaveitunnar.

Bráðabirgðafjárlög McCarthy innihéldu ekki ákvæði úr þverpólitísku fjárlagafrumvarpi öldungadeildarinnar, sem snerist um sex milljarða dala aðstoðarpakka handa Úkraínumönnum.

Vólódómír Selenskí, forseti Úkraínu, ferðaðist nýverið til Bandaríkjanna, þar sem hann ræddi við þingmenn í báðum deildum þingsins. Hann sagði Úkraínumenn geta sigrað Rússa og að þeir væru að sigra, frekari aðstoð væri þó nauðsynleg.

Aðspurður um það hvort hann myndi leggja fram sérstakt frumvarp um aðstoðina á komandi vikum vék McCarthy sér undan því að svara spurningunni.

Eins og Mitch McConnell, sagði Chuck Schumer, forseti öldungadeildarinnar, að Demókratar myndu berjast fyrir áframhaldandi aðstoð til Úkraínu. Meirihluti þingmanna beggja flokka væru hlynntir þeirri aðstoð og að hún væri mikilvæg öryggishagsmunum Bandaríkjanna og lýðræði í heiminum.

Schumer hefur sett frumvarp um áðurnefndan þrjú hundruð milljóna dala aðstoðarpakka á dagskrá öldungadeildarinnar.