Að líka illa við yfir­manninn sinn

Því já, staðreyndin er sú að sumt fólk einfaldlega kann ekki við yfirmann sinn. En líkar vel við starfið sitt og vinnufélagana. 

Margt getur spilað þar inn í. Hvernig týpa yfirmaðurinn er yfir höfuð. Hlýleg manneskja, kaldhæðin, hrósar fólki, talar niður til fólks…. Hér geta birtingarmyndirnar verið alls konar.

Við skulum vona að í sem flestum tilfellum líki fólki nokkuð vel við yfirmann sinn. Ekki aðeins svo það sé ánægðara í starfi, heldur hafa rannsóknir sýnt að það eru mun meiri líkur á að okkur gangi vel í vinnunni og starfsframanum, þegar okkur kemur vel saman við þann aðila sem stjórnar.

En hvað er til ráða þegar við gerum það ekki?

Um þessi mál er búið að skrifa fjöldann allan af greinum. Til dæmis má lesa ágætis grein á ensku í Harvard Business Review um það hvernig við getum látið okkur lynda betur við yfirmanninn okkar, sjá hér.

Hér eru líka nokkur einföld ráð. 

#1: Hvað er málið?

Það er ekki nóg að segja: Ég þoli hann/hana ekki. Við verðum að vera með haldbærari skýringar en það. Veltum til dæmis fyrir okkur: Hverjum líkar ekki við hvern?

Finnst þér að yfirmanninum líki ekki við þig eða er það öfugt. Eða gagnkvæmt?

Gott er að gera smá greiningu í huganum. Var sambandið ykkar til dæmis einu sinni mun betra og kom eitthvað upp sem breytti því? Ertu að sinna þínu vel? Og svo framvegis.

#2: Að læra af sínum eigin mistökum

Áður en við dæmum allt á yfirmanninn og hvers konar týpa sá/sú er, skulum við líka vera hugrökk og líta í eigin barm. Því ef það er eitthvað sem við kannski mættum betrumbæta sjálf, þá skulum við ekki sleppa því skrefi að átta okkur á því hvað það er og vinna síðan áfram með það.

#3: Lausnin okkar

Það segir sig sjálft að það er erfitt að vinna allt árið um kring á vinnustað þar sem okkur líkar ekki vel við yfirmanninn. Þannig að næst er að velta fyrir okkur hvernig hægt er að leysa úr málum. Í flestum tilfellum virkar ekki vel að ,,klaga“ yfirmanninn, nema tilefni sé til og þá að vel undirbúnu máli.

En ef málið snýst aðeins um persónulega upplifun á yfirmanninum horfir málið öðruvísi við. Skrifaðu niður það sem truflar þig mest og veltu fyrir þér lausnina út frá því.

Dæmi:

Það sem truflar mig mest er að mér finnst ekki alveg nægilega skýrt hvað hann/hún eiginlega ætlast til af mér og hvers vegna hann/hún er svona óánægður með mig?

Ef þetta er raunverulega skýringin á því hvernig þér líður, fælist lausnin í því að fá samtal hjá yfirmanninum eða einhverjum sem þú telur þig geta rætt við, til þess að fá skýringu á því til hvers er ætlast til af þér. Í framhaldinu getur þú síðan áttað þig á því hvort þetta hreinsi andrúmsloftið og þú ferð að upplifa stöðuna öðruvísi.

#4: Það jákvæða

Þá er það jákvætt viðhorf. Því það er algjörlega sama í hvaða aðstæðum við erum, okkur tekst alltaf að takast betur á við þær ef við erum jákvæð frekar en neikvæð. Allt sem þér finnst því jákvætt við vinnuna þína og yfirmanninn þinn er því ágætt að lista upp.

Já, þú last rétt: Skrifaðu niður það sem þér finnst jákvætt við yfirmann þinn.

Því það er þannig að enginn er svo ómögulegur að það sé ekki eitthvað jákvætt líka. Því ef okkur finnst það, hvað er það þá að segja um okkur sjálf? Ekkert okkar getur nefnilega verið svo dómhart að segja að önnur manneskja sé fullkomlega ómöguleg. Við erum nefnilega öll breysk og eigum öll okkar kosti og galla.

#5: Að skipta um vinnu

Ef þú ert ánægð/ur í starfi er alls ekkert víst að það sé rétt skref fyrir þig að segja upp og hætta. Því það er ekkert víst að þér muni líka næsta starf eins vel.

Ef þú ert hins vegar óánægð/ur í starfi, horfir málið öðruvísi við. Því að þegar við erum óánægð, erum við líklegri til að falla í gryfju neikvæðra hugsana. Líka að hætta að þola fólk.

Veltu fyrir þér skynsömum skrefum. Hvað er best fyrir þig? Hvað langar þig helst til að gera? Hvernig sæir þú fyrir þér að gera það? Hvernig mun þér líða þegar þangað er komið?

Það sama á við ef þér finnst þú eiginlega í kolröngu starfi eða á kolrangri hillu. Þá snýst verkefnið líka um að huga að þínum eigin draumum og væntingum og vinna að því að ná þeim markmiðum sem þú heldur að séu best fyrir þig. En hætta að eyða orkunni í að hugsa um hvað þér finnst um einhverja aðra manneskju.