Ó­missandi hefðir lista­manna á að­ventunni

Hamborgarhryggur og mandarínur

Tónlistarmaðurinn Kristmundur Axel Kristmundsson segist alla tíð hafa verið mikið jólabarn. Að sögn Kristmundar eru jólin fyrir honum mandarínur og samverustundir með fjölskyldunni. 

„Auk þess finnst mér allir svo næs úti í samfélaginu, allir verða bara betri manneskjur yfir hátíðarnar. En strax í janúar breytist fólk á einhvern óskiljanlegan hátt og það brýst út eitthvað dýrslegt eðli á ný.

Ég væri til í að fólk væri jafn hamingjusamt og þakklátt allan ársins hring eins og það er í desember,“ segir hann.

Hvað þykir þér ómissandi á aðventunni?

„Ég myndi segja að hamborgarhryggurinn sé ómissandi þáttur af jólunum. Þetta árið verðum við fjölskyldan á Tenerife þannig það verður áhugaverð tilbreyting að fara út að borða á aðfangadegi, “ segir Kristmundur.

Jólasveinabúningur og laufabrauð

„Það sem mér þykir ómissandi á aðventunni er að máta jólasveinabúninginn og fíflast í ókunnugum börnum með trúðnum mínum sem er miklu meiri jólasveinn en ég,“ segir rithöfundurinn Þorgrímur Þráinsson sem er aðeins eitt atriði af mörgum sem Þorgrímur hefur helgað sér fyrir hver jól;

„Að búa til laufabrauð heima hjá Ferðagerði (Þorgerði systur minni) - Frú Garðabær. Og stelast í deigið.

Að blasta George Michael, Eagles, Elton John og ekki síst hlusta á Robbie Williams syngja My way. 

Að draga djúpt andann, kveikja á kertum og lesa áhugaverðar bækur. 

Að horfa á Love Actually með fjölskyldunni. 

Að laumast í lakkrís, malt og appelsín og konfekt. 

Að taka á því ræktinni og gleyma mér svo í kalda og heitu pottunum. 

Að detta inn á kaffihús og undirbúa næsta ár og hlakka til að takast á við mikilvægustu verkefnin. 

Að labba um miðbæinn, kíkja í fallegar búðir og hitta vingjarnlegt fólk. 

Að verða saddur og sæll í góðra vina hópi og skrafa fram eftir kvöldi. 

Að byrja á næstu skáldsögu eða handriti sem hafa verið of lengi í biðröð. 

Að horfa á frúna töfra fram hverja máltíðina á fætur annarri. 

Að hlakka til að skrifa jólakortin sem gleymast stundum í óðaönn,“ segir Þorgrímur.

Jólahald víða um heiminn

Ásgrímur Geir Logason, leikari og hlaðvarpsstjórnandi Betri Helmingsins, segist mikið jólabarn sem hann hefur verið frá blautu barnsbeini. 

„Ég hef ekki fest í miklum hefðum þar sem ég hef í gegnum tíðina prufað allskonar útfærslur af jólahaldi, bæði á Tenerife með fjölskyldu, San Fransisco, á hótelherbergi í Boston og svo heima í faðmi fjölskyldunnar,“ segir Ási eins og hann er kallaður. 

Að sögn Ása eyðir hann öðrum hverjum jólum með börnunum sínum sem hann aðlagar að þeim.

„Börnin eru hjá mér á aðfangadag annað hvert ár. Jólin á móti eru því með amerískum hætti. Þá tökum við upp pakkana þegar við vöknum á náttfötunum á jóladag og fáum okkur heitt kakó. Að mínu mati er það mega kósý stund,“ segir hann.

Ási segir fáar hefðir hafa fest sig í sessi á hans heimili í gegnum tíðina, nema ein:

„Svo að jólin komi verður möndlugrauturinn hennar ömmu heitinnar að vera á borðum. Honum hefur meira að segja verið flogið um allan heim bara svo ég geti fundið jólaandann.“