Chelsea í úr­slit eftir stór­sigur

Chelsea tryggði sér í kvöld sæti í úrslitum enska deildarbikarsins er liðið vann sannkallaðan stórsigur gegn B-deildarliði Middlesbrough í kvöld, 6-1.

Gestirnir í Middlesbrough unnu fyrri leik liðanna 1-0 og Chelsea-menn voru því með bakið upp við vegg fyrir leik kvöldsins.

Þeir bláklæddu voru þó fljótir að koma sér úr vandræðunum því liðið tók forystu í leik strax á 15. mínútu þegar Jonathan Howson varð fyrir því óláni að setja boltann í eigið net áður en Enzo Fernandez tvöfaldaði forystu heimamanna stundarfjórðungi síðar.

Axel Disasi skoraði svo þriðja mark Chelsea á 36. mínútu áður en Cole Palmer sá til þess að Chelsea fór með 4-0 forystu inn í hálfleikshléið og einvígið svo gott sem búið.

Cole Palmer bætti öðru marki sínu og fimmta marki Chelsea við á 77. mínútu og varamaðurinn Noni Madueke rak síðasta naglann í kistu Middlesbrough fjórum mínútum síðar.

Gestirnir náðu þó inn einu sárabótarmarki á 88. mínútu þegar Morgan Rogers kom boltanum í netið, en þar við sat.

Niðurstaðan því afar öruggur 6-1 sigur Chelsea og samanlagður 6-2 sigur staðreynd. Chelsea er því ál eið í úrslit enska deildarbikarsins þar sem liðið mætir annað hvort Liverpool eða Fulham, en Middlesbrough situr eftir með sárt ennið.