Týnir öllu þannig að flest staldrar stutt við í töskunni

Kristín er almennt meira fyrir litlar töskur og er Prada buddan hennar í miklu uppáhaldi.

Hvað er í töskunni þinni og segðu okkur aðeins frá því sem er?

Ég er ekkert voðalega dugleg að ganga með tösku en ég elska þessa litlu Prödu sem ég næ að troða daglegum nauðsynjum í, sem væri þá helst bíllykillinn, eitthvað í hárið, gloss eða varasalvi, sólgleraugu, tyggjó og góður ilmur!

Hefur einhver hlutur tilfinningalegt gildi?

Ekki beint, ég týni öllu og þá sérstaklega sólgleraugum og glossum, þannig flest staldrar stutt við í töskunni (mér tókst meira segja að týna Diesel töskunni minni í fyrra ef einhver hefur rekist á hana). 

En ég hef ótrúlega gaman af því að kíkja ofan í tösku eða veski og finna þar til dæmis lestarmiða frá útlöndum, teikningar frá syni mínum eða þess háttar sem vekur upp góðar minningar.

Er eitthvað sem er alltaf í töskunni þinni?

Síminn held ég að sé það eina sem mér hefur ekki tekist að tapa og er yfirleitt alltaf með mér.

Hver er þín uppáhalds taska og afhverju?

Litla prada buddan er kannski í mestri notkun og svo á ég eina silkitösku frá Opera sport sem allt kemst fyrir í og passar við allt.

Ertu dugleg að taka til í töskunni þinni og halda röð og reglu?

Nei alveg þokkalega ekki. Ég er alltaf að flýta mér, með allt dálítið út um allt og á það til að hrúga alls konar dóti ofan í þær. Ég kem oft sjálfri mér á óvart með hvað leynist þar! En ég er að vinna í þessu.

Ertu gjarnan með margar töskur á þér eða margar til skiptanna?

Yfirleitt er ég dálítið að swinga á milli eftir tilefni, sérstaklega í útlöndum. Þá er gott að geta valið eftir outfitti eða stemningu.

Stór eða lítil taska og afhverju?

Mér finnst mjög gott oft að hafa litla því þá er ég snögg að finna það sem mig vantar og kem engum óþarfa fyrir, en stundum er maður bara í þannig fíling að hafa allt í einum stórum totebag, til að geta til dæmis hoppað í sund eða að versla.