Deilur og leiðindi við vinnu­fé­laga og góð ráð

Eða að upplifa að einhver leiðindi liggi í loftinu. Stundum geta leiðindi nefnilega falist í því sem ekki er sagt.

Hér er ekki verið að tala um deilur sem snerta vinnustaðinn sem slíkan. Heldur eitthvað sem gerir það að verkum að andrúmsloftið verður þrúandi á milli vinnufélaga af persónulegum ástæðum eða vegna þess að skoðanir eru mjög skiptar. 

Hvað er þá til ráða?

Jú, eins og svo oft gildir boðskapurinn: Ekki gera ekki neitt.

Hins vegar skiptir miklu máli að vanda sig í að finna úrlausn mála. Svo markmiðið náist um að bæta úr hlutunum. Enda erfitt að mæta til vinnu alla virka daga, jafnvel að vinna í sama rými, en þú og viðkomandi eins og frosin í framan eða jafnvel með fýlusvip. Horfist ekki einu sinni í augu eða sýnið svipbrigði unglingsins þegar annar aðilinn talar og svo framvegis.

Í dag ætlum við að rýna í nokkur góð ráð, sem miðast við að deilur eða einhver leiðindi, sýnileg eða ósýnileg, liggi í loftinu. Án þess þó að tengjast vinnustaðnum sem slíkum.

Hvernig getum við leyst úr málum sjálf?

1. Ekki safna í lið

Það skiptir miklu máli að skapa ekki kjaftagang á vinnustað. Ef þér finnst málið snúast um þig og viðkomandi vinnufélaga, en ekki vinnustaðinn sem slíkan, er mikilvægt að vera ekki að tjá sig við aðra samstarfsfélaga.

Enda hvorki rétt gagnvart þeim né umræddum einstaklingi, að þú farir að ræða málin við aðra nánast eins og til að safna í þitt eigið lið.

2. Ekki horfa undan

Annað sem skiptir máli er að horfast í augu við að það sem liggur í loftinu, mun mjög líklega ekki hverfa af sjálfu sér.

3. Jákvæðni

Það þarf mismikið til að eyða ágreiningi eða deilum. Stundum dugir jafnvel að vera bara jákvæð og brjóta ísinn með brosi, jákvæðum kveðjum og trúnna á að báðir aðilar vilji yfirstíga það sem kom upp.

Hversu mikið eða lítið sem þarf til, skiptir öllu máli að vinna í málum með jákvæðu hugarfari.

4. Á persónulegum nótum

Þá er mælt með því að leysa úr málum auglitis til auglitis. Eða í það minnsta á persónulegum nótum. Hafðu í huga að hinn aðilinn þarf jafn mikið svigrúm og þú til að skýra út sínar tilfinningar og sjónarmið.

5. Ekkert í uppnámi né heift

Lykilatriði er að ræða málin alls ekki þegar við erum í uppnámi eða reið. Frekar að gefa smá andrými og setjast niður þegar báðir aðilar eru tilbúnir til að leysa úr málum með jákvæðu hugarfari, þótt umræðuefnið sé erfitt eða viðkvæmt.

6. Enginn köttur í kringum heitan graut

Stundum er fólk ekki meðvitað um það hvernig þér líður. Sú staða gæti því verið uppi að þér líði eins og þú þurfir að leysa úr málum með viðkomandi, en hinn aðilinn er ekki að upplifa að neitt sé að.

Þegar verið er að ræða málin, er gott að koma sér beint að efninu en vanda sig þó við að samskipti séu falleg og ekkert sagt sem er særandi. Leggðu áherslu á hreinskilni á uppbyggjandi hátt og forðastu orðfæri sem gæti verið meiðandi.

7. Það sameiginlega

Áður en tekist er á við málin er líka mjög gott fyrir okkur að fara yfir það sjálf, hvað okkur finnst jákvætt við vinnusambandið sem við eigum með viðkomandi og hvað hjá ykkur tveimur tengir ykkur saman: Til dæmis í skoðunum og öðru. Það getur líka hjálpað að hefja samtalið með því að vísa í það góða.

8. Að hlusta mjög vel

Þegar þú sest niður og ræðir málin skiptir jafn miklu máli að vanda sig við hlustun og að vanda sig við það sem við segjum sjálf.

Reyndu að standa þig frábærlega í að hlusta á sjónarmið vinnufélagans. Óháð því hvort þú sért sammála öllu eða ekki. Þessi sjónarmið eru jafn mikilvæg og þín.

9. Engar ásakanir

Áður en reynt er að leysa úr málum, er gott að segja það skýrt að þú viljir fyrst og fremst reyna að leysa úr málum með uppbyggilegum hætti. 

Sem þýðir að samtalið getur ekki snúist um að annar aðilinn ásaki hinn. 

10. Þriðji aðilinn

Stundum getur það verið of erfitt fyrir góða vinnufélaga að leysa úr málum ein og sér. Svona rétt eins og stundum gerist í parsambandi, þar sem auðveldara verður að leysa úr málum með aðstoð þriðja aðila.

Ekki vanmeta að sú staða gæti verið besta leiðin í ykkar tilfelli. Spurningin er þá hver gæti verið þessi þriðji aðili, sem þó tekur afstöðu með hvorugum?

Það fer alveg eftir því um hvað málið snýst, hvort þessi aðili ætti að vera yfirmaður eða mannauðsfulltrúi, eða hvort leita ætti til annarra aðila. Til dæmis vinnufélaga sem báðir aðilar treysta fullkomlega, eða einhver ráðgefandi fagaðili utanhús.

Þá er gott að gefa sér tíma. Ef eitt samtal er ekki nóg, er í lagi að leyfa báðum aðilum að hugsa aðeins málin og hittast síðan aftur.

Mikilvægt er að báðir séu sammála um að leysa úr málum þannig að niðurstaða verði skýr um hvað eigi að taka við.