Hefur ó­eðli­lega þörf fyrir að strauja allt frá skyrtum í barnasamfellur

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Um sjöleytið yfirleitt, þegar konan mín fer í ræktina og ég freista þess að setjast aðeins niður og átta mig á deginum áður en börnin vakna. Þegar þau vakna, sem er mjög fljótlega, reyni ég að næra þau og að öðru leyti halda öllu í skorðum þangað til konan kemur heim.”

Hvað er það fyrsta sem þú gerir á morgnana?

„Ég byrja daginn ekki á kaffi ólíkt öðrum enda sannfærðist ég einhvern tíma um að maður ætti að láta níutíu mínútur líða frá því að maður vaknar og þar til maður fær sér fyrsta bollann. Þetta krefst stillingar en kaffið virkar betur á mann svona, ég mæli með að prófa þetta. 

Ég læt tímann fram að fyrsta bolla oft líða með að að strauja skyrtu dagsins eða önnur föt. 

Frá því að ég fór í skiptinám til Spánar sem ungur maður hef ég haft óeðlilega þörf fyrir að strauja allt frá skyrtum og stuttermabolum niður í barnasamfellur. 

Konan mín lýsir þessu sem áráttu en hún getur varla kvartað enda nýtur hún góðs af.”

Hefur þú hugleitt að opna kaffihús?

„Nei, ég myndi eftirláta konunni að gera það, eins og fram hefur komið. Og eiginlega ekki einu sinni henni, enda tel ég viðskiptatækifærin ekki beint augljós í harðri samkeppni á veitingamarkaði.“

Í hvaða verkefni ertu að vinna helst í þessa dagana?

„Ég er vakinn og sofinn yfir mínu margmiðlunarfyrirtæki Ritstjóri ehf. og svo er ég í seinni tíð einnig nokkuð upptekinn við fundarstjórn og álitsgjöf í öðrum fjölmiðlum en mínum eigin. 

Að auki er ég reyndar í óformlegum viðræðum um eitt afar spennandi verkefni sem er þó ótímabært að gera frekari grein fyrir.“

Hvernig skipuleggur þú þig í vinnu?

Fyrri hluti vikunnar fer jafnan í greinaskrif af hefðbundnari toga en eftir því sem líður á vikuna er ég farinn að vinna að vikulegum hlaðvarpsþáttum, fréttum vikunnar og Skoðanabræðrum. 

Föstudaga nota ég oft í að skreppa í viðtöl eða spjall annars staðar enda hef ég þá skilað flestu af mér fyrir þá viku.

Á hverjum degi reyni ég að helga að minnsta kosti klukkustund lestri góðrar bókar, helst íslenskrar og helst að hún sé skrifuð fyrir miðja síðustu öld. 

Ég hef mikla ánægju af framandi orðalagi frá fyrri tíð sem er þó enn nothæft. Um leið er kostur að hlífa sér um stundarsakir við sálræna skaðanum sem stanslaus viðvera á internetin hefur í för með sér.“

Hvenær ferðu að sofa á kvöldin?

„Það veltur á ýmsu og einkum því hvenær yngri heimilismenn ákveða að lognast út af, en í ákjósanlegu ástandi hefjast tilraunir mínar til að fara upp í rúm um tíuleytið. 

Síðan þróast málin þannig að það tekst ekki fyrr en um ellefu eða á miðnætti, sem er verra því að fljótlega er maður aftur vaknaður til að glíma við andsetið en auðvitað voða sætt pelabarn, Má litla.“