Salah sjóð­heitur af stað að vanda

Liverpool sótti nýliða Ipswich Town heim í fyrsta deildarleik sínum undir stjórn Arnes Slot, og fagnaði 2-0 sigri. Þetta var fyrsti leikur Ipswich í ensku úrvalsdeildinni í 22 ár.

Staðan var markalaus eftir tíðindalítinn fyrri hálfleik en snemma í seinni hálfleik gerðu heimamenn tilkall til vítaspyrnu. Að lokum var hins vegar dæmd rangstaða á þá.

Eftir þetta hrökk Liverpool-liðið í gír og hafði skapað mikla hættu áður en Portúgalinn Diogo Jota skoraði svo fyrra mark leiksins, eftir sendingu frá Mohamed Salah.

Salah, Jota og og Luis Diaz voru í fremstu víglínu Liverpool en enginn þeirra átti skot í fyrri hálfleiknum. Það kom hins vegar ekki að sök og eftir að hafa lagt upp markið fyrir Jota þá skoraði Salah sjálfur með laglegum hætti, eftir sendingu frá Dominik Szoboszlai.

Frammistaða Salah ætti ekki að koma neinum á óvart því hann hefur skorað eða lagt upp mark í fyrstu umferð á hverju einasta tímabili sínu í ensku úrvalsdeildinni.

Eftir mörkin tvö var sigur Liverpool aldrei í hættu og liðið fékk færi til að bæta við fleiri mörkum, til að mynda í uppbótartíma þegar Norður-Írinn Conor Bradley komst í dauðafæri en skot hans var varið.

Næsti leikur Liverpool er gegn Brentford á Anfield eftir viku og liðið spilar svo á útivelli við Manchester United 1. september. Ipswich á næst leik við sjálfa Englandsmeistara Manchester City á útivelli.