Innlent

Taka höndum saman gegn hnífaburði: „Þú ert aumingi“

Ólafur Björn Sverrisson skrifar
Sindri Geir, Aron Kristinn og Villi Neto eru á meðal þeirra sem senda ungmennum sem kjósa að bera hnífa skýr skilaboð.
Sindri Geir, Aron Kristinn og Villi Neto eru á meðal þeirra sem senda ungmennum sem kjósa að bera hnífa skýr skilaboð. vísir

Skýr skilaboð berast frá samfélagsmiðlastjörnum þessa dagana vegna fréttaflutnings og umræðu um aukinn hnífaburð ungmenna og þess skaða sem hann veldur: þeir sem bera hnífa úti á lífinu eru aumingjar og eiga sér engar málsbætur.

Fjallað hefur verið um fjöldamörg dæmi hnífaburðar ungmenna síðustu daga. 17 ára stúlka sem stungin var með hnífi í miðborginni lét lífið fyrir helgi. Um helgina voru tveir stungnir í gistiskýlinu Granda og lögregla greindi frá því í morgun að hnífi hafi verið beitt á bæjarhátíðinni Í túninu heima. 

Forsætisráðherra kallar eftir auknum sýnileika lögreglu. Afbrotafræðingur segir útköllum vegna vopnaburðar ungmenna hafa fjölgað verulega en flest segjast ungmennin ganga með hníf til að verja sig. 

„Slepptu því“

Á samfélagsmiðlum er nú mikið rætt um hnífaburð og margir þjóðþekktir einstaklingar sem hafa tekið höndum saman gegn þessu samfélagsmeini. Tiktok-myndband tónlistarmannsins Arons Kristins Jónassonar, þar sem hann ræðir stunguárásina við Skúlagötu, hefur til að mynda fengið um 120 þúsund áhorf.

„Ef þú ert lítill strákur og ert eitthvað „hmm ætti ég að taka hnífinn með mér“, gaur, slepptu því. Það er enginn að fara að stinga neinn, þú ert ekki að fara að stinga neinn. Ef þú ert með hníf á þér þá ættirðu að skammast þín. Þú ert aumingi, Guð blessi þig.“

@aronkristinn47 hræðilegt ástand #fyrirþig #íslenskt ♬ original sound - aron kristinn

Villi Neto skemmtikraftur tekur í sama streng. „Þetta er bara ömurlegt, þetta er ógeðslegt. Ekki vera að taka hníf með ykkur.“

@villineto #stitch með @aron kristinn ♬ original sound - Villineto

Sindri Geir Óskarsson sóknarprestur í Glerárkirkju á Akureyri er vinsæll á samfélagsmiðlinum TikTok.  Hann lætur málið sig varða.

„Sumt sem við gerum er hægt að taka aftur, en ef við tökum líf, þá er ekki hægt að taka það aftur,“ segir Sindri Geir. „Mér er alveg sama hvaða rök þú heldur að þú hafir fyrir því að taka hníf eitthvert. Það er bara kjaftæði, svo skildu hann eftir heima. Hentu honum, eyðileggðu hann og ekki leyfa vinum þínum að komast upp með að mæta vopnaðir eitthvert.“

@serasindri

Sumt er ekki hægt að taka aftur. Guð blessi fjölskyldu hennar.

♬ original sound - Séra Sindri Geir

Sævar Breki Einarsson meðlimur poppsveitarinnar Nussun hefur sambærileg skilaboð. „Ekki taka ákvörðun sem getur eyðilagt bæði líf þitt og annarra.“

@saevarbreki Ekki taka ákvörðun sem eyðileggur líf #fyrirþig #fyp #foryou ♬ original sound - Sævar Breki

Jón Már Gunnarsson kvikmyndagerðarmaður veltir fyrir sér ástæðum þess að ungt fólk beri hnífa almennt. 

„Við þurfum að standa saman gegn þessu. Ekki vera með hníf, ekki umgangast fólk sem er með hníf. Tökum skýra og sterka afstöðu: enga hnífa í kringum mig, út með þig.“

@marsupli #islensktiktok #islenskt #engahnífa ♬ original sound - Jón Már 🇮🇸

„Ekki vera aumingi með hníf,“ eru sömuleiðis skilaboðin á mynd sem gengið hefur um samfélagsmiðla. 

Lögreglumál Samfélagsmiðlar Stunguárás við Skúlagötu

Tengdar fréttir

Hnífi beitt á bæjarhátíðinni Í túninu heima

Lögreglan var með mikinn viðbúnað í gær og í nótt vegna bæjarhátíðarinnar Í túninu heima í Mosfellsbæ. Hnífi var beitt í líkamsárás á hátíðinni á föstudag en fórnarlambið slapp við áverka. Gerandi er þó enn ófundinn og hefur lögregla ekki upplýsingar um viðkomandi að svo stöddu.

Tveir stungnir í gistiskýlinu Granda

Tveir urðu fyrir stunguárás í gistiskýlinu á Granda í dag. Hvorugur hlaut alvarlega áverka en annar hinna stungnu var sendur á slysadeild til aðhlynningar. Stuttu síðar var grunaður árásarmaður handtekinn skammt frá vettvangi þar sem hann hafði falið sig undir bifreið.

Mest lesið


Fleiri fréttir

Sjá meira


×

Mest lesið