Ráðist í at­hugun hjá Skel vegna meintrar markaðsskiptingar

Þetta segir í tilkynningu Skeljar til Kauphallar. Þar segir að fyrirtækjum sé lagalega skylt að gangast við athugun sem framkvæmd er á grundvelli ákvörðunar Eftirlitsstofnunar EFTA.

Vísi barst ábending um að lögreglumenn hafi verið í húsakynnum Samkeppniseftirlitsins í morgun að undirbúa sig fyrir húsleit. Ekki hefur náðst í Pál Gunnar Pálsson, forstjóra Samkeppniseftirlitsins, í dag. Þá kvaðst Ásgeir Helgi Reykfjörð Gylfason, forstjóri Skeljar, vera á fundi og óskaði eftir skriflegum spurningum, þegar slegið var á þráðinn til hans.

Uppfært: Í tilkynningu á vef Samkeppniseftirlitsins er staðfest að ESA hafi ráðist í fyrirvaralausa athugun sem tengist afmörkuðum smásölumarkaði á Íslandi. Með aðgerðunum í dag hafi ESA í fyrsta sinn verið að framkvæma fyrirvaralausa athugun á fyrirtæki hér á landi.

Ólafur Þór Hauksson héraðssaksóknari staðfestir í samtali við fréttastofu að lögreglumenn á vegum embættisins hafi aðstoðað við aðgerðir.

Markaðshlutdeildin um einn tíundi

Í tilkynningu Skeljar segir að Lyfjaval sé í eigu Heimkaupa ehf., sem aftur sé í 81 prósent eigu Skeljar og tengdra félaga. 

„Samkvæmt ákvörðun ESA er athugunin hluti af athugun á mögulegri markaðsskiptingu á smásölumarkaði með lyf. Nánar tiltekið í hefðbundin apótek og bílalúguapótek. Meint markaðsskipting á að hafa falist í því að Lyfjaval lokaði hefðbundnu apóteki í Mjódd og einbeitt sér að því að starfsrækja bílalúguapótek. SKEL hefur áætlað markaðshlutdeild Lyfjavals í kringum 10%.“

Skel hafi eignast Lyfjaval að hluta þann 25. júní 2021. Lyfjaval hafi verið keypt að fullu þann 29. mars 2023. Félög tengd Skel eigi og reki sjö apótek, þar af fimm bílalúguapótek. Öll bílalúguapótek séu einnig hefðbundin apótek, það er þar sem gengið er inn. Frá árinu 2022 hafi þrjú ný apótek verið opnuð.

Hafi enga ástæðu til að ætla að brotið hafi verið gegn samkeppnislögum

Í tilkynningu segir að athugun ESA snúi meðal annars að viðskiptum þegar Lyfjaval seldi verslunarhúsnæði í Mjódd í eigu félagsins til Lyfja og heilsu með samningi 26. apríl 2022. 

Samkeppniseftirlitinu hafi verið sérstaklega tilkynnt um þau viðskipti. Samkeppniseftirlitið hafi lokið málinu með ákvörðun þann 2. mars 2023. Málið hafi verið kært til áfrýjunarnefndar Samkeppnismála, sem hafi úrskurðað í málinu þann 9. ágúst 2023.

„SKEL og Lyfjaval munu aðstoða við athugun málsins og hafa veitt ESA aðgang að umbeðnum upplýsingu. SKEL hefur enga ástæðu til að ætla að brotið hafi verið gegn samkeppnislögum í starfsemi Lyfjavals.“