Fær nokkuð já­kvæð við­brögð þegar hann vandar sig í eld­húsinu

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

Ég vakna flesta daga stundvíslega klukkan sjö. Breytir engu þó að ég gleymi að stilla klukku. 

Með aldrinum er ég að færast sífellt meira yfir í að vera A týpa. Sakna þess stundum að geta ekki sofið almennilega út. 

Stundum er norski skógarkötturinn á heimilinu búinn að vekja okkur hjónin fyrir hefðbundinn fótaferðatíma.“

Hvað er það fyrsta sem þú gerir á morgnana?

„Ég byrja daginn á því að fá mér kaffibolla og renna í gegnum helstu fjölmiðla, alltaf spennandi að sjá hvort að einhverjir stórir atburðir hafi gerst um nóttina. 

Ég opna líka tölvupósthólfið til að kanna hvort að eitthvað brýnt eða spennandi erindi hafi borist, svo rifja ég einnig upp hvernig ég er bókaður yfir daginn sem framundan er. 

Bestu dagarnir eru jafnan þegar að ég næ að taka sundsprett um morguninn áður en farið er til vinnu. Þá daga sem það næst er ég alveg einstaklega ferskur og vel stemmdur.“

Í hvaða heimilisverkum finnst þér sjálfur þú vera rosalega góður í?

„Ég hef mjög gaman að því að elda góðan mat. Ég held því að ég sé nokkuð lunkinn kokkur og vona að aðrir séu mér sammála. 

Mér hefur fundist ég fá nokkuð jákvæð viðbrögð frá fjölskyldu og vinum þegar að ég vanda mig í eldhúsinu. 

Þetta er kannski klassískt dæmi um að hægt sé að ná færni í því sem maður hefur sérstakan áhuga á.“

Í hvaða verkefni ertu að vinna helst í þessa dagana?

„Þessa dagana einbeitum við okkur hjá Kletti að því að ljúka rekstrarárinu með góðum árangri og fara fram úr þeim markmiðum sem við settum okkur. Við erum einnig í miðri vinnu við gerð rekstraráætlunar fyrir næsta ár, sem er krefjandi verkefni í ljósi þeirrar óvissu sem ríkir í rekstrarumhverfi okkar.

Á sama tíma er mikið að gera í dekkjahlutanum hjá okkur, enda er haustið annasamur tími þegar kemur að dekkjum og annarri vetrartengdri þjónustu við viðskiptavini okkar. Við leggjum mikla áherslu á að mæta þörfum viðskiptavina með framúrskarandi þjónustu, bæði fyrir einstaklinga og fyrirtæki, sem treysta á fagmennsku okkar.

Í þeim atvinnugreinum sem skipta okkar rekstur mestu máli er mikilvægt að staðið sé vel að framþróun og uppbyggingu innviða. Ég vona að næstu mánuðir muni skapa aðstæður í stjórnmálum sem styðja vel við atvinnulífið.“

Hvernig skipuleggur þú þig í vinnu?

„Ég nota dagatalið í Outlook og To-Do kerfið á nokkuð skilvirkan hátt. Ég er líka með minnisbók sem fylgir mér á alla fundi og í hana punkta hjá mér allt sem mér finnst skipta máli og ég vil muna. Mikilvægast er að allt sem ég lofa, og mér er lofað sé fært þar til bókar. 

Ég verð þó að viðurkenna það að ég er ekki hættur að krota á gula post-it miða alls kyns hluti sem mér finnst að megi alls ekki gleymast. Ég reyni samt að hafa þá ekki of áberandi á skrifborðinu mínu dags daglega.“

Hvenær ferðu að sofa á kvöldin?

,,Það er nú aðeins breytilegt. Ég vaki nú yfirleitt lengur fram á kvöld á sumrin en á veturna, sérstaklega á fallegu íslensku sumarkvöldi. En ég er yfirleitt kominn í ró milli tíu og ellefu þegar að það er hefðbundinn annasamur vinnudagur daginn eftir.“