Alls bárust tæplega 26 þúsund atkvæði í kosningunni á Vísi og hlutu varnargarðsmennirnir sterka kosningu.
Varnargarðsmennirnir, hafa staðið vaktina nótt sem dag á hættusvæði í námunda við endurtekin eldgos nærri Grindavík með það fyrir augum að verja heimili og fyrirtæki í Grindavík og mikilvæga innviði á svæðinu. Myndbönd af gröfumönnum á flótta undan flæðandi hrauni hafa vakið heimsathygli.
Fréttastofa Stöðvar 2, Vísis og Bylgjunnar valdi hins vegar Yazan Tamimi mann ársins og tók hann á móti viðurkenningunni í Kryddsíldinni í gær.
Oftast gaman
Sigfús Öfjörð ýtustjóri tók við viðurkenningunni fyrir hönd varnargarðsmanna, sem hann telur að séu á bilinu fimmtíu til hundrað talsins.
„Þetta er búið að vera mest gaman bara. Svo er náttúrlega alvarleiki inn á milli og verst er þegar nýbúið er að gjósa og við erum að fylla upp í götin í kappi við tímann. Það er aksíon í því,“ segir Sigfús í samtali við þáttastjórnendur.
Margir muna eftir Sigfúsi sem manninum sem bjargaði gröfunni sinni undan rennandi hrauni á harðahlaupum.
„Við lögðum vélunum um kvöldið og svo gaus um nóttina, akkúrat á þeim stað sem við lögðum vélunum,“ segir Sigfús. Þeir hafi mætt á staðinn en þurft að bíða eftir leyfi til að fara inn á svæðið og bjarga vélunum.
„Svo fáum við leyfi og þá var hraunið komið svolítið nálægt. Við vorum beðnir um að fjarlægja vélina og vera fljótir að því,“ segir Sigfús. Hann segist hafa fundið hitann frá hrauninu meðan á þessu stóð.
Hvað fór í gegn um hugann þinn þarna?
„Aðallega bara að detta ekki á hausinn. Og svo náttúrlega að vona að græjan væri alveg tilbúin að fara í gang,“ segir Sigfús. Hann segist hafa komið sjálfum sér á óvart í herlegheitunum.
„Maður fattar hvað maður er lítill miðað við náttúruna,“ segir Sigfús aðspurður hvernig sé að vinna í námunda við náttúruhamfarir. „Það verður að vera góð skipulagning á verkþættinum. Þeir hafa verið mjög góðir í því, verkstjórar og tæknimenn, að hanna þetta.“
Hefur þetta tekið á hópinn andlega?
„Nei nei. Maður hugsar náttúrlega um fólkið sem býr Grindavík. Það er agalegt fyrir það að þurfa að yfirgefa allt svæðið og vita svo ekkert meira fyrr en þetta hættir. Eða hvenær þetta hættir.“
Fyrri verðlaunahafar:
- 2009 Edda Heiðrún Backman
- 2010 Þórður Guðnason
- 2011 Mugison
- 2012 Eiríkur Ingi Jóhannsson
- 2013 Heilbrigðisstarfsmaðurinn
- 2014 Tómas Guðbjartsson
- 2015 Þröstur Leó Gunnarsson
- 2016 Karlalandsliðið í knattspyrnu
- 2017 Grímur Grímsson
- 2018 Bára Halldórsdóttir
- 2019 Björgunarsveitarmaðurinn
- 2020 Heilbrigðisstarfsmaðurinn
- 2021 Guðmundur Felix Grétarsson
- 2022 Haraldur Ingi Þorleifsson
- 2023 Fannar Jónasson bæjarstjóri í Grindavík
Fréttin verður uppfærð.
