Appel­sínu­gular viðvaranir: Gæti minnt á ó­veðrið 2015

Fyrstu viðvaranir taka gildi á miðnætti í kvöld og eru ýmist gular eða appelsínugular í gildi á morgun. Aðfaranótt fimmtudags taka svo gildi appelsínugular viðvaranir um land allt og gilda til klukkan 17. Eftir það á veðrið að batna.

„Þetta er með þeim kröftugri sem koma,“ segir Óli Þór Árnason veðurfræðingur hjá Veðurstofunni í samtali við fréttastofu. Í raun sé um tvær lægðir að ræða sem muni ganga yfir landið. Sú fyrri gangi á land um hádegisbil á morgun og sú seinni aðfaranótt fimmtudags.

Ofsaveður á köflum

Í viðvörun Veðurstofunnar segir að um sé að ræða sunnan 20-30 m/s (stormur, rok eða ofsaveður). Hlýtt um allt land og rigning, talsverð eða mikil á sunnan- og vestanverðu landinu. Raskanir á samgöngum líklegar. Útlit fyrir vatnavexti. Líkur á staðbundnu foktjóni.

„Þetta er sunnan suðvestan stormur eða rok, og jafnvel ofsaveður á köflum,“ segir Óli Þór.

Vindhraði í byggð verði allt að 28 til 30 metrar á sekúndu en hviður töluvert fyrir ofan það. Á miðhálendi fari vindhraði upp í 33 metra á sekúndu.

„Það verður gríðarlega hvasst og mikil úrkoma. Það snögghlýnar þegar þetta kemur fer þannig úrkoman fer mjög hratt úr þessum éljagangi sem er núna í kringum hádegi á morgun og það hvessir á tveimur til þremur tímum upp í þennan vind og úrkoman fer í samfellda rigningu.“

Það megi búast við talsvert mikilli rigningu á Suðausturlandi og norðanverðu Snæfellsnesi.

„Svo er hætta á foktjóni þegar vindur er orðinn svona mikill, að auki.“

Minni á slæmt veður 2015

Óli Þór vill ekki segja til um það hvort það verði aukin skriðuhætta en það sé samt þannig að þegar það eru auknir vatnavextir og það snögghlýnar eykst hættan á krapaflóðum og aurskriðum ef það er snjór í fjöllum. Það megi búast við tilkynningu frá ofanflóðavaktinni um það.

Óli Þór segir élin verða sæmilega öflug í dag og í nótt og það bæti þannig í snjóinn áður en lægðin gengur yfir landið. Það muni því taka smástund fyrir vatnið að komast að niðurföllunum sé ekki hreinsað frá þeim áður en veðrið skellur á.

Óli Þór segir þetta veður minna á veðrið sem gekk yfir landið þann 14. mars 2015. Þá hafi ekki verið sama viðvörunarkerfi en líklegt sé að þá hefði einnig verið gefnar út samsvarandi viðvaranir fyrir landið allt. Þá fór allt á flot í Mosfellsbæ og björgunarsveitir voru kallaðar út um land allt. 

Fölsk öryggiskennd

„Það er ekki útilokað að það verði farið í rautt ef efni þykir til en það verður gert með minni fyrirvara. Þetta er þannig veður að það þarf lítið út af bregða til að gera það verra eða betra. Það eru kaflar inn á milli sem verða ekki alveg jafn slæmir en heilt yfir er óðs manns æði að taka viðvörun af fyrir tvo til þrjá tíma ef það á að hvessa aftur seinna. Það gefur fólki falska öryggiskennd,“ segir Óli Þór.

Seinni partinn á fimmtudaginn verði svo aftur komin suðvestanátt með éljum og veðrið svipað því sem það er núna.

„Þetta verður rúmur sólarhringur þar sem verður mjög leiðinlegt veður. Frekar hryssingslegt til hádegis á morgun þegar fyrri lægðin kemur og svo kemur seinni lægðin á fimmtudagsmorgun eða aðfaranótt fimmtudags. Um miðjan dag fimmtudag skánar þetta aftur.“