Upp­gjörið: Kefla­vík - ÍR 81-90 | Að­eins Harry Potter getur bjargað Kefla­vík

Hörmulegt gengi Keflavíkur ætlar engan endi að taka. ÍR-ingar gerður góða ferð í Blue-höllina og unnu sannfærandi níu stiga sigur 81-90. Eftir áramót hefur Keflavík aðeins unnið einn af síðustu sex leikjum. 

Eftir síðasta leik gegn KR steig Pétur Ingvarsson, þjálfari Keflavíkur, frá borði og Magnús Þór Gunnarsson stýrði liðinu. Það var ekki að sjá til að byrja með að það hafi létt eitthvað á liðinu heldur var þetta sama hörmungin og hafði aðeins unnið einn af síðustu fimm leikjum á árinu.

ÍR byrjaði töluvert betur og komst þrettán stigum yfir 2-15. Remu Emil Raitanen, leikmaður Keflavíkur, átti fína innkomu og gerði sex stig á stuttum tíma en varnarleikur Keflavíkur var enginn líkt og verið hefur allt tímabilið. Staðan eftir fyrsta fjórðung var 21-29.

Annar leikhluti fór af stað nákvæmlega eins og fyrsti leikhluti þróaðist. ÍR-ingar spiluðu frábærlega og settu stig á töfluna þegar þeir vildu. Eftir því sem leið á seinni hálfleik fór að ganga betur hjá Keflvíkingum sem unnu leikhlutann og komu muninum undir tíu stig í hálfleik.

Staðan í hálfleik var 42-49.

Það var allt annað að sjá Keflvíkinga í upphafi síðari hálfleiks. Liðið gerði fyrstu sjö stigin og Magnús Þór Gunnarsson, þjálfari Keflvíkinga hefur greinilega sagt eitthvað við sína menn í hálfleik. Igor Maric setti síðan niður þrist um miðjan þriðja leikhluta og kom Keflavík yfir í fyrsta skipti í leiknum og þá tók Borce Ilievski, þjálfari ÍR, leikhlé.

Góður taktur í leik Keflavíkur var þó ekki lengi að breytast og um miðjan þriðja leikhluta gerðu ÍR-ingar tíu stig í röð og voru fimm stigum yfir þegar haldið var í síðasta fjórðung 64-69.

ÍR-ingar stýrðu ferðinni í fjórða leikhluta og gáfu Keflvíkingum aldrei tækifæri á að koma til baka og gera þetta að spennandi leik. ÍR vann á endanum níu stiga sigur 81-90.

Atvik leiksins

Þegar tæplega tvær mínútur voru eftir var smá augnablik með Keflvíkingum sem voru að reyna koma til baka átta stigum undir. Sóknin fór þó ekki betur en það að Ty-Shon Alexander henti boltanum í fótinn á Igor Maric og heimamenn töpuðu boltanum. Saga leiksins hjá Keflvíkingum.

Stjörnur og skúrkar 

Jacob Falko steig upp og var frábær eins og margir aðrir í liði ÍR-inga. Falko var stigahæstur með 28 stig, 5 fráköst og 8 stoðsendingar.

Það voru margir skúrkar í liði Keflavíkur og liðið lítur út eins og bútasaumsteppi. Nigel Pruitt á ennþá eftir að sýna fólki af hverju hann var fenginn aftur til að spila körfubolta á Íslandi. 

Dómararnir [6]

Dómarar kvöldsins voru Davíð Tómas Tómasson, Gunnlaugur Briem, Bjarni Hlíðkvist Kristmarsson.

Það er orðið þema í dómgæslu í Bónus deildinni að dómarar sé farnir að taka sér meiri tíma í að hugsa og flauta seinna í flautuna. Sem skiptir svo sem engu máli þegar komist er að réttri niðurstöðu. Það var eitt og eitt sérstakt atvik í kvöld en ekkert sem hafði áhrif á úrslit leiksins.

Stemning og umgjörð

Umgjörðin er alltaf til fyrirmyndar í Keflavík og þá sérstaklega núna þegar það er komið ansi veglegt háborð fyrir fjölmiðlamenn. Undirritaður er ennþá að halda í vonina um að vaxa í 170 sentímetra en á meðan beðið er eftir því er svona háborð ansi kærkomið.

ÍR-ingar héldu stemningunni á lofti eins og alltaf. Það skiptir engu máli hvort það sé heima eða útileikur þeir mæta alltaf og láta vel í sér heyra.

„Trúum að ef við komumst í úrslitakeppnina þá getum við farið lengra“

Borce Ilievski, þjálfari ÍR, var afar ánægður með sigurinn í fjarveru Matej Kavas sem var í leikbanni.

„Þetta var erfiður leikur sérstaklega vegna þess að Matej Kavas var í leikbanni og ég var með þynnri hóp. Aðrir fengu tækifæri og nýttu það vel,“ sagði Borche og hélt áfram.

„Við byrjuðum leikinn mjög vel. Ég veit ekki hvort Keflvíkingar hafi verið í sjokki en maður vissi að þeir myndu koma til baka en við reyndum að bregðast við því. Við leyfðum Keflavík að koma til baka í byrjun seinni hálfleiks en eftir leikhlé komum við til baka og náðum forystunni.“

En hvað gerðist í spilamennsku ÍR-inga eftir að Keflavík komst yfir sem skilaði tíu stigum í röð hjá gestunum.

„Við þurfum að breyta einhverju varnarlega og við vissum að það væri ekki hægt að skilja Igor Maric opinn. Við vildum stöðva hraðann sóknarleik og við reyndum að koma í veg fyrir að þeir gætu spilað sinn leik sem er að setja niður þrista. Við reyndum að hægja á þeim og við þurftum að stýra hraðanum sem við gerðum.“

Eftir sigur kvöldsins er ÍR í áttunda sæti og færi þá í úrslitakeppnina og að mati Borche var það alltaf markmiðið frekar en að bjarga bara liðinu frá falli þegar hann var ráðinn þjálfari á miðju tímabili.

„Við trúum að ef við komumst í úrslitakeppnina þá getum við farið lengra. Meira að segja þegar ég tók við liðinu var fyrsta markmiðið mitt að fara með liðið í úrslitakeppnina ég var ekki að hugsa um að bjarga liðinu frá falli. Mér finnst þetta bara snúast um okkur hversu langt við getum farið,“ sagði Borche að lokum.