Íslenski boltinn

Erfiðasta frum­raun fé­lags í efstu deild í 36 ár

Óskar Ófeigur Jónsson skrifar
Mosfellingar fagna hér sætinu í Bestu deildinni eftir sigur á Keflavík í úrslitaleik á Laugardalsvellinum.
Mosfellingar fagna hér sætinu í Bestu deildinni eftir sigur á Keflavík í úrslitaleik á Laugardalsvellinum. Vísir/Anton

Besta deild karla í fótbolta fer af stað í kvöld með sögulegum leik þegar eitt félag og eitt bæjarfélag bætist í hóp þeirra sem hafa átt lið í deild þeirra bestu hér á landi.

5. apríl 2025 er nefnilega stór dagur í sögu Aftureldingar í Mosfellsbæ en karlalið félagsins spilar í kvöld sinn fyrsta leik í efstu deild frá upphafi.

Það má segja að verkefni kvöldsins sé eins erfitt og þau finnast í íslenska boltanum en Mosfellsbæjarliðið er þar á útivelli á móti Íslandsmeisturum Breiðabliks.

Auðvelt er að halda því fram að þetta sé í raun erfiðasta frumraun félags í efstu deild í 36 ár þegar tekið er mið af gengi mótherjanna á árinu á undan. Síðast spilaði félag sinn fyrsta leik í efstu deild á móti ríkjandi Íslandsmeisturum árið 1989.

Fylkir var þá að leika sinn fyrsta leik í efstu deild og spilaði við Íslandsmeistara Fram á gervigrasinu í Laugardal. Fram vann leikinn þökk sé sigurmarki Guðmundar Steinssonar á tólftu mínútu.

Frá því að Fylkismenn léku sinn fyrsta efstu deildarlið fyrir 36 árum þá hafa ellefu félög verið í sömu sporum. Ekkert þeirra mætti hins vegar ríkjandi meisturum.

Gróttumenn komust næst þessu þegar þeir mættu Blikum i frumraun sinni fyrir fimm árum en Blikar enduðu í öðru sæti í deildinni sumarið á undan.

Fjögur af þessum ellefu félögum tókst að vinna sinn fyrsta leik í efstu deild frá upphafi en það voru Leiknir 2015, Fjölnir 2008, Skallagrímur 1997 og Stjarnan 1990. HK 2007 og ÍR 1998 gerðu jafntefli í sínum fyrsta leik en hin fimm liðin (Vestri 2023, Grótta 2020, Víkingur Ó. 2013, Selfoss 2010 og Grindavík 1995) töpuðu aftur á móti í frumraun sinni.

  • Frumraun félaga í efstu deild karla í fótbolta síðustu áratugi:
  • Afturelding 2025
  • Mætir Breiðabliki (Íslandsmeistari) á útivelli í kvöld
  • Vestri 2023
  • Tap á móti Fram (10. sæti árið á undan) á útivelli
  • Grótta 2020
  • Tap á móti Breiðabliki (2. sæti) á útivelli
  • Leiknir 2015
  • Sigur á móti Val (5. sæti) á útivelli
  • Víkingur Ó. 2013
  • Tap á móti Fram (10. sæti) á heimavelli
  • Selfoss 2010
  • Tap á móti Fylki (3.sæti) á heimavelli
  • Fjölnir 2009
  • Sigur á Þrótti (10.sæti) á útivelli
  • HK 2007
  • Jafntefli á móti Víkingi (7.sæti) á útivelli
  • ÍR 1998
  • Jafntefli á móti Grindavík (7.sæti) á útivelli
  • Skallagrímur 1997
  • Sigur á Leiftri (3.sæti) á heimavelli
  • Grindavík 1995
  • Tap á móti Keflavík (3. sæti) á heimavelli
  • Stjarnan 1990
  • Sigur á Þór Akureyri (7. sæti) á útivelli
  • Fylkir 1989
  • Tap á móti Fram (Íslandsmeistari) á útivelli



Fleiri fréttir

Sjá meira


×