Hafi ógnað öryggi flugsins en fær samt bætur

Í úrskurði Samgöngustofu segir að konan hafi, ásamt samferðafólki sínu, kvartað til stofnunarinnar eftir að hafa verið neitað um far til Lissabon í Portúgal með Play í byrjun júlí árið 2023. Hópurinn hafi farið fram á staðlaðar skaðabætur á grundvelli reglugerðar Evrópusambandsins um sameiginlegar reglur um skaðabætur og aðstoð til handa farþegum sem er neitað um far og þegar flugi er aflýst eða mikil seinkun verður. Þá hafi hópurinn krafist endurgreiðslu á útlögðum kostnaði vegna ófullnægjandi aðstoðar af hálfu Play.

Gátu ekkert annað en meinað konunni byrðingu

Samgöngustofa hafi sent Play kvörtunina og í svari félagsins hafi komið fram að einn í hópi kvartenda, konan sem hér um ræðir, hefði sýnt af sér ógnandi hegðun. Henni hefði af þeirri ástæðu verið neitað að fara um borð, með vísan til skilmála Play.

Samgöngustofa hafi þá sent kvertendum svar Play til umsagnar en engin svör hafi borist frá þeim.

Þá hafi Samgöngustofa óskað eftir því að Play legði fram skriflega staðfestingu frá flugstjóra í umræddu flugi þess efnis að hann hefði tekið þá ákvörðun um að neita konunni um far á grundvelli öryggissjónarmiða vegna háttsemi og hegðunar hennar fyrir flugið.

Samgöngustofa hafi ítrekað beiðni sína nokkru síðar og þá borist svar Play skömmu síðar. Það hafi sagt að konunni hefði verið neitað um byrðingu við hliðið vegna ástands og hegðunar hennar, sem hafi verið með þeim hætti að flugöryggi væri ógnað.

„Var hegðun farþega þess eðlis að starfsmenn á okkar vegum gátu ekkert annað gert en að neita farþega um borð á grundvelli öryggisástæðna.“

Play hafi vísað til reglugerðar þar sem kveðið sé á um að neitun um far á grundvelli öryggissjónarmið feli ekki í sér neitun um far í skilningi reglugerðarinnar og því væri ekki um bótaskyldu að ræða.

Hefðu þurft að leggja fram staðfestingu

Í úrskurðinum segir að samkvæmt lögum um loftferðir fari flugstjóri með æðsta vald í loftfari. Flugstjóra sé heimilt, þegar nauðsyn ber til, að synja viðtöku í loftfar eða vísa úr því flugverjum, farþegum, farangri eða farmi.

Við meðferð málsins hafi Samgöngustofa óskað eftir að fá skriflega staðfestingu flugstjóra í fluginu sem um ræðir um að að hann hefði tekið ákvörðun um að neita einum kvartenda um far á grundvelli öryggissjónarmiða vegna háttsemi og hegðunar hans fyrir flugið. Slík staðfesting hafi ekki fengist  þrátt fyrir ítrekanir af hálfu Samgöngustofu.

Þrátt fyrir að Play hafi mælt fyrir um að félagið áskildi sér rétt til að meina farþegum um far í skilmálum sínum beri við beitingu þeirra að hafa hliðsjón af ákvæðum loftferðalaga og því valdi sem flugstjóra er ætlað samkvæmt lögunum.

Samgöngustofa hafi í úrskurðarframkvæmd sinni litið svo á að staðfesting flugstjóra þess efnis að hann hafi tekið ákvörðun um að neita farþega um far á grundvelli réttmætra ástæðna dugi til sönnunar á atvikum. Ljóst sé að sönnunarbyrði um atvik hvílir á flugrekanda. 

„Í ljósi þess að [Play] hefur ekki lagt staðfestingu flugstjóra á að hann hafi tekið ákvörðun um að neita einum kvartenda um far á grundvelli öryggissjónarmiða, og vegna skorts á haldbærum gögnum um ástæður þess að kvartanda var synjað um borðgöngu, er það mat [Samgöngustofu] að atvikið hafi falið í sér neitun á fari í skilningi j-liðar 2. gr. og 4. gr. reglugerðar EB nr. 261/2004. Þar sem einungis einum kvartenda var neitað um far ber að fallast á kröfu hans um greiðslu staðlaðra skaðabóta úr hendi [Play].“

Loks segir að þegar farþegum er neitað um far eigi þeir rétt á að velja á milli endurgreiðslu og nýs flugs á lokaáfangastað. Þar sem konunni hafi ekki verið boðin sú aðstoð eigi hún rétt á endurgreiðslu fargjaldsins.