Ætla að hunsa kosningarnar

Forystumenn Hamas-samtakanna ætla að sniðganga forsetakosningarnar í Palestínu 9. janúar og hvetja stuðningsmenn sína til að gera slíkt hið sama. Þessu lýstu þeir yfir í gær, nokkrum klukkutímum áður en frestur til að tilkynna framboð rann út. Vitað var fyrirfram að Hamas myndi ekki tilnefna frambjóðanda í mótmælaskyni við að ekki skyldi kosið til þings á sama tíma og nýr leiðtogi er kjörinn. Hvatning samtakanna til félagsmanna sinna um að greiða ekki atkvæði getur hins vegar grafið undan réttmæti kosninganna og rýrt umboð sigurvegarans.