Höttur í þriðja sætið

Hattarmenn unnu tvo góða sigra í 1. deild karla í körfubolta um helgina og tryggðu sér með því þriðja sætið í deildinni og hafa þar með heimavallarrétt í úrslitakeppninni sem hefst í vikunni. Þór frá Akureyri hefur þegar tryggt sér sæti í úrvalsdeildinni sem deildarmeistari en fjögur næstu lið, Valur, Höttur, Stjarnan og Breiðablik, keppa um hitt sætið í úrslitakeppninni en úrslitakeppni liða í 2. til 5. sæti fer nú fram í fyrsta sinn. Í undanúrslitum úrslitakeppninnar mætast því Valur og Breiðablik annarsvegar og svo Höttur og Stjarnan hinsvegar og það lið fer áfram sem fyrr vinnur tvo leiki. Sigurvegarar þessara einvíga spila síðan um sæti í úrvalsdeildinni. Ármann/Þróttur og ÍA þurftu hinsvegar að sætta sig við fall í 2. deild.