Juventus endurheimti annað sætið á Ítalíu

Juventus vann 1-0 sigur gegn Udinese í lokaleik dagsins í ítölsku úrvalsdeildinni en Fabio Grosso skoraði eina mark leiksins fyrir heimamenn á Ólympíuleikvanginum í Tórínó.

Juventus endurheimti þar með annað sæti deildarinnar sem AC Milan komst tímabundið í fyrr í dag með 4-3 sigri gegn Cagliari á San Siro-leikvanginum í Mílanó.

Juventus er fimm stigum á eftir Inter en bæði félög hafa spilað þrettán leiki. Liðin mætast innbyrðis í þar næstu umferð í deildinni.