Lögregla hefur lokað veginum frá Hvolsvelli að Skógum vegna jarðskjálftahrinunnar í Eyjafjallajökli. Ef gos hefst undir jökli má búast við hlaupi í Markarfljóti.
Um 20 bæir hafa verið rýmdir en ekki er vitað hversu margt fólk er á þessum bæjum. Á þessari stundu er alls óvíst hvort það gjósi en miklir jarðskjálftar hafa verið undir toppi Eyjafjallajökuls frá því klukkan ellefu í kvöld. Skjálftarnir eru flestir á um 2 kílómetra dýpi.
