Ítalskir hermenn í rusli

Ítalskir hermenn hafa verið sendir til borgarinnar Napólí í óvenjulegum erindagjörðum, en þeir eiga að takast á við gríðarlegt magn af rusli sem safnast hefur saman á götum borgarinnar.

Um tvö þúsund tonn af sorpi eru nú á götunum og hafa íbúar margsinnis kveikt í ruslahaugunum til þess að mótmæla ástandinu. Þetta er í annað sinn frá árinu 2008 sem herinn er kallaður til vegna þessa. Vandamálið skapast af tvennu, ruslahaugar borgarinnar eru löngu orðnir fullir og ónothæfir og brennsluofnar hafa ítrekað bilað.