Kveikt í útikömrum í Garðabæ

Kveikt var í þyrpingu af útikömrum úr plasti í grennd við Sjálandsskóla í Garðabæ í nótt og var kallað á slökkvilið um klukkan hálf fjögur. Kamrarnir voru alelda og að hruni komnir þegar slökkviliðsmenn komu á vettvang og slökktu eldinn. Nálæg hús voru ekki í hættu.

Mikinn svartann reyk lagði frá brennandi plastinu, en það var nánast logn þegar þetta gerðist þannig að reykurinn steig beint til lofts og lagðist hvergi yfir íbúðabyggð. Brennuvargurinn er ófundinn.