Loka þurfti Bolungarvíkurgöngum vegna reyks

Lögreglan á Ísafirði lokaði Bolungarvíkurgöngum í skyndingu í gærkvöldi eftir að vegfarendur þar tilkynntu Neyðarlínunni um eld og reyk í göngunum. Vegfarendurnir komust út og varð ekki meint af nema hvað þeim var illa brugðið.

Við rannsókn kom í ljós að kveikt hafði verið í tveimur stórum neyðarblysum sem gáfu frá sér mikinn reyk og rauðan loga. Göngin voru opnuð aftur þegar blásar í þeim höfðu hreinsað loftið og leitar lögregla nú þeirra sem þetta gerðu.