Angelina Jolie heimsótti Afganistan

Hollywoodstjarnan Angelina Jolie fór í óvænta heimsókn til höfuðborgar Afganistan, Kabúl, á dögunum en þar hitti hún flóttamenn í borginni.

Angelina sleppti að mæta á Óskarinn á sunnudaginn og flaug frekar til Kabúl á mánudagsmorgun, en hún er góðgerðarsendiherra Sameinuðu Þjóðanna. Í lok ferðar sinnar biðlaði hún til umheimsins um að hjálpa milljónum flóttamanna í Afganistan.

„Við þurfum að einbeita okkur núna að því að sameina svæðið og þá á ég ekki við að setja upp athvarf þar sem fólk getur leitað sér skjóls. Við þurfum að tryggja að á svæðinu sé hreint vatn, atvinnutækifæri og skóli fyrir börnin, þá þurfum við að setja upp heilsugæslustöð sem fólkið hefur aðgang að," sagði Angelina í lok ferðarinnar.