Elfar Aðalsteins með tvær myndir á RIFF

Ráðgjafar kvikmyndahátíðarinnar RIFF hafa valið 20 íslenskar stuttmyndir til sýningar á hátíðinni. Meðal þeirra eru Sailcloth eftir Elfar Aðalsteins, sem var á "shortlist" til Óskarsverðlauna í vor og skartar leikaranum John Hurt í aðalhlutverki. Elfar sýnir einnig myndina Subculture á hátíðinni.

Íslensk kvikmyndagerð hefur verið áberandi á RIFF síðustu ár og erlendir blaðamenn sem sækja hátíðina sýna henni vaxandi áhuga. Það er því vel við hæfi að úrval íslenskra stuttmynda sé jafn öflugt og raun ber vitni.

Hér má sjá sýnishorn úr Subculture eftir Elfar Aðalsteins:

Subculture Trailer from Berserk Films on Vimeo.

Meðal annarra stuttmynda á RIFF má nefna Afhjúpunina eftir tónlistarmanninn Richard Scobie. Einnig fyrstu mynd sjónvarpsmannsins Nilla, Níels Thibaud Girerd, sem heitir Villa (Error). Margir bíða spenntir eftir að sjá þá mynd en Ísland í dag kíkti bak við tjöldin á tökum myndarinnar í vor. Hægt er að skoða þáttinn hér á sjónvarpssíðu Vísis.

Leikstjórinn Ása Hjörleifsdóttir mætir til leiks með myndina Ástarsaga. Myndin er lokaverkefni Ásu frá Columbia háskólanum í New York. Aðalhlutverkið leikur Katherine Waterston, dóttir bandaríska leikarans Sam Waterston. Hér má sjá sýnishorn úr Ástarsögu:

Astarsaga Teaser Trailer from Ása Hjörleifsdóttir on Vimeo.

Ari Alexander Ergis Magnússon mætir með einnar mínútu mynd sem nefnist Urna og gefur tóninn fyrir mynd í fullri lengd byggða á Missi eftir Guðberg Bergsson.

Þá sýnir Erlingur Óttar Thoroddsen hrollvekjuna Child Eater þar sem ljóti kallinn í skápnum er raunverulegur en hér má sjá sýnishorn úr henni:

Child Eater Trailer from Erlingur Óttar Thoroddsen on Vimeo.



Alls bárust 45 stuttmyndir til valnefndar. Dómnefnd hátíðarinnar veitir einni mynd verðlaun úr minningarsjóði Thors Vilhjálmssonar auk Canon EOS-60D myndavélar frá Nýherja. Verðlaunin voru veitt í fyrsta sinn í fyrra en þá vann Skaði (Come to Harm) eftir Börk Sigþórsson.

Rúmur mánuður er þar til kvikmyndahátíðin RIFF fer fram en hún hefst 27. september og stendur til 7. október. Ítalski hryllingsmyndaleikstjórinn Dario Argento verður heiðursgestur. Sala hátíðarpössum og klippikortum er þegar hafin á heimasíðunni riff.is.

Íslenskar stuttmyndir á RIFF 2012:

Afhjúpunin (Blindsided)

Richard Scobie

Anima

Hallur Örn Árnason

Ástarsaga (Love Story)

Ása Hjörleifsdóttir

Brynhildur og Kjartan (In Sickness and in Health)

Ásthildur Kjartansdóttir

Child Eater

Erlingur Óttar Thoroddsen

Drunken Cacophony

Ellen Ragnarsdóttir og Raam Reddy

Einn á báti (Guðlaugur)

Skúli Andrésson

En dag eller to

Hlynur Pálmason

Follow the sun

Ari Allansson

Fórn (Sacrifice)

Jakob Halldórsson

Grafir og Bein (Secret and Lies)

Anton Sigurðsson

Ofbirta

Hörður Freyr Brynjarsson

Reptilicus: Initial Conditions

Guðmundur Ingi Markússon

Sailcloth

Elfar Aðalsteins

Subculture

Elfar Aðalsteins

The Pirate of Love

Sara Gunnarsdóttir

The Prophecy of the Seeress

Laurie Schapira

Urna

Ari Alexander Ergis Magnússon

Villa (Error)

Níels Thibaud Girerd

Yfir horfinn veg (Memory Lane)

Andri Freyr Ríkarðsson