Menning

Flottur stökkpallur

"Það er mjög erfitt að komast þarna inn svo við erum mjög glaðir," segir Davíð Óskar Ólafsson, framleiðandi hjá Mystery. Endurgerðin á íslensku kvikmyndinni Á annan veg, sem leikstýrt var af Hafsteini Gunnari Sigurðssyni og framleidd af Mystery, verður frumsýnd á Sundance-kvikmyndahátíðinni á nýju ári.

Endurgerðin ber nafnið Prince Avalanche og skartar leikurunum Paul Rudd og Emile Hirsch í aðalhlutverkum. Leikstjórinn er David Gordon Green, en sá er öllum hnútum kunnugur á kvikmyndahátíðinni frægu. "Það var klárlega alltaf markmiðið að fara inn á Sundance sem er ein stærsta hátíðin í Bandaríkjunum. Þangað koma allir stærstu dreifingaraðilar í bransanum til að finna falda gimsteina," segir Davíð Óskar og bætir við að Sundance sé besti stökkpallurinn fyrir myndina.

Markmiðið er svo að Prince Avalanche fari í dreifingu á sem flesta staði í Bandaríkjunum og Evrópu í kjölfarið á Sundance-hátíðinni. Mystery og Flickbook eiga sýningarréttinn á endurgerðinni hér á landi og býst Davíð við því að hún verði sýnd hér einhvern tíma á nýju ári, en það kemur til með að haldast í hendur við dreifingu vestanhafs. "Við vonum náttúrlega að myndinni verði dreift sem víðast. Það hafa margar myndir notið góðs gengis eftir sýningar á Sundance eins og Little Miss Sunshine, sem sló heldur betur í gegn út um allan heim eftir að hún var uppgötvuð á hátíðinni."

Davíð Óskar ætlar sjálfur út til að vera viðstaddur frumsýninguna þann 20. janúar ásamt Hafsteini Gunnari Sigurðssyni leikstjóra, Árna Filippussyni, framleiðanda og tökumanni, og Tobie Munthe framleiðanda. "Við höfum ekkert séð af myndinni frekar en nokkur annar en leikstjórinn er með þá reglu að leyfa aðstandendum, meira að segja leikurunum, að njóta myndarinnar í miklum gæðum í kvikmyndahúsi í fyrsta sinn."

alfrun@frettabladid.is

Davíð Óskar Ólafsson.
Tengd myndbönd:

Fréttir, 7. júní 2012: Á annan veg endurgerð

Tengdar greinar:

Á annan veg keppir um verðlaun Norðurlandaráðs

Á annan veg sigraði í Torino

Á annan veg fékk góðar viðtökur í San Sebastian

Á annan veg til Gautaborgar

Á annan veg fær ellefu tilnefningar

Hilmar einn efnilegasti leikarinn í Evrópu

Maður er manns gaman








Fleiri fréttir

Sjá meira


×