Lewis Hamilton á ráspól í Kína

Lewis Hamilton náði ráspól í Kína en í næstu sætum voru Red Bull bílarnir þar sem Daniel Ricciardo náði öðru sæti á ráslínu og Sebastian Vettel því þriðja.

Það rigndi á brautinni í byrjun tímatökunnar og fór þriðja æfingin því fram á blautri braut. Ökumenn fikruðu sig áfram og mátuðu regn og milliregndekk við aðstæður á brautinni. Fórnarlömb fyrstu lotu tímatökunnar voru Max Chilton, Marcus Ericsson, Jules Bianchi, Kamui Kobayashi og Esteban Gutierrez.

Pastor Maldonado tók hinsvegar ekki þátt í tímatökunni, Lotus liðið náði ekki að skipta um vél í bíl hans í tæka tíð eftir þriðju æfinguna eftir að vélin hætti að skila afli á æfingunni vegna olíuleka. Það verður því undir dómurunum komið að leyfa honum að keppa á morgum.

Önnur lotan hófst á því að flestir ökumenn fóru út á milliregndekkjum. Þeir sem féllu út í annarri lotu voru Sergio Perez, Kevin Magnussen, Adrian Sutil, Daniil Kvyat, Jenson Button og Kimi Raikkonen.

Þriðja lotan var mjög spennandi, rigningin jókst örlítið á milli loka annarar lotu og upphafs þriðju lotu. Ökumenn freistuðu þess að fara strax í upphafi lotunnar á milliregndekk og ná að góðum tíma en brautin virtist lagast eftir því sem leið á lotuna.

Lewis Hamilton, Daniel Ricciardo og Sebastin Vettel sátu fyrir svörum blaðamanna eftir tímatökuna. Hamilton var nokkuð brattur í ljósi stöðunnar og ræddi möguleika sína.

„Það var sleipt úti á brautinni og það er mikilvægt að gera ekki mistök, sérstaklega með þessa tvo svona skammt undan að ýta á eftir manni. Bíllinn er hinsvegar góður og hefur liðið unnið mjög vel saman þessa helgina,“ sagði Hamilton.

„Það var mjög gaman að ná hrignum í lokin, ég átti augljóslega frekar erfitt alla tímatökuna en á síðasta dekkjaganginum nýtti ég tækifærið og náði að setja góðan tíma undir lokinn,“ sagði Ricciardo eftir tímatökuna.

„Við erum í bestu stöðunni til að reyna að gera þeim (Mercedes) erfitt fyrir á morgun, þeir eru þó sennilega of fljótir í þurru,“ sagði Vettel.

Niðurstaða tímatökunnar var:

1.Lewis Hamilton - Mercedes

2.Daniel Ricciardo - Red Bull

3.Sebastian Vettel - Red Bull

4.Nico Rosberg - Mercedes

5.Fernando Alonso - Ferrari

6.Felipe Massa - Williams

7.Valtteri Bottas - Williams

8.Nico Hulkenberg - Force India

9.Jean-Eric Vergne - Toro Rosso

10.Romain Grosjean - Lotus

11.Kimi Raikkonen - Ferrari

12.Jenson Button - McLaren

13.Daniil Kvyat - Toro Rosso

14.Adrian Sutil - Sauber

15.Kevin Magnussen - McLaren

16.Sergio Perez - Force India

17.Esteban Gutierrez - Sauber

18.Kamui Kobayashi - Caterham

19.Jules Bianchi - Marussia

20.Marcus Ericsson - Caterham

21.Max Chilton - Marussia

22.Pastor Maldonado - Lotus

Keppnin er á dagskrá Stöð 2 Sport klukkan 6:30 í fyrramálið.