Meira um hvað gerðist í keppninni hér í Bílskúrnum, léttu hliðinni á Formúlu 1 hér á Vísi.

Nico Rosberg ætlaði sér að ná forystunni í keppninni strax í upphafi, hann ætlaði sér að komast fram úr Lewis Hamilton. Rosberg læsti dekkjunum illa og þurfti að skipta um dekk á fyrsta hring til að skemma ekki bíl sinn vegna skjálfta frá flötum hluta dekkjanna.
„Hver er áætlunin núna,“ spurði Rosberg á öðrum hring eftir að hafa skipt um dekk. „Við þurfum líklega að keyra til loka á þessum dekkjum Nico,“ var svar liðsins við þeirri spurningu.
Á áttunda hring sagði Rosberg „Ég er að keyra þannig að ég nái að klára keppnina, bara svo þið vitið það.“
Nico kvartaði svo undan dekkjasliti á 22. hring. Hann sagði svo að dekkin væru að koma til baka á hring 33.
„Já auðveldlega, eða kannski ekki auðveldlega en já ég mun ná til loka,“ sagði Rosberg aðspurður um hvort dekkin myndu endast til loka á hring 40 af 53.
„Afsakið þetta, þetta var óþarfi,“ sagði Rosberg við liðið eftir keppnina og viðurkenndi að þetta atvik í upphafi. „Takk fyrir frábæran bíl, sem gerði mér fært að endurheimta sætið í keppninni,“ bætti hann svo við.
Stoppið var það eina hjá Rosberg í Rússlandi. Hann var í 21. sæti eftir það og hafði nóg að gera við að taka fram úr og vinna sig upp listann. Hann endaði þar sem hann byrjaði en fór lengstu mögulegu leið að því. Var hann ekki einfaldlega of gráðugur í upphafi? Jú sennilega, hefði hugsanlega átt að reyna að stríða Hamilton seinna í keppninni en það gat hann ekki vegna eigin mistaka strax í upphafi. Mistökin gerðu fyrsta rússneska kappaksturinn afar rólegan, miðað við margar keppnir sem hafa farið fram í ár.

Mercedes liðið tryggði sér sinn fyrsta heimsmeistaratitil bílasmiða. Mercedes Benz hefur aldrei áður unnið heimsmeistaratitil bílasmiða, já það hljómar undarlega en er staðreynd. Þegar Mercedes vann síðast heimsmeistarakeppni ökumanna þá var engin keppni fyrir bílasmiði.
Liði hefur drottnað í ár og gengið ótrúlega vel. Margt hefur þó mátt fara betur en aðallega virðist liðið hafa skemmt fyrir sjálfu sér, t.d. í Ungverjalandi þegar Rosberg og Hamilton rákust saman.
Mercedes náði níundu tvennunni á tímabilinu í Rússlandi, það er bæði fyrsta og öðru sæti í keppni. Liðið er einni tvennu frá meti Mclaren frá 1988.
Bæði Niki Lauda og Toto Wolff lögðu mikla áherslu á mikilvægi Ross Brawn í velgengni Mercedes liðsins. Hann lagði mikla vinnu í grunnstoðir fyrirtækisins. Margra ára vinna hefur loksins skilað árangri.

Daniel Ricciardo vildi snemma í keppninni fá að komast fram úr liðsfélaga sínum Sebastian Vettel.
„Ég er að tapa miklum tíma hérna,“ sagði Ricciardo. Honum varð ekkert ágengt að reyna að fá liðið til að skipa Vettel að hleypa honum fram úr.
Christian Horner, liðsstjóri Red Bull sagði eftir keppnina að það hefði ekki skipt máli því Ricciardo ætti hvort eð er ekki möguleika á að verða heimsmeistari ökumanna, þótt stærðfræðilegur möguleiki þá er hann stjarnfræðilegur. Fyrir utan það að Red Bull getur lítið hótað Vettel. Hvað ætla þeir að gera, reka manninn sem er að fara til Ferrari?

Brautin í Sochi er ný og í raun vissu liðin ekki almennilega hvað þau voru að fara út í. Mörgum kom á óvart hversu mikið grip var á brautinni. Það leiðir til meiri hraða sem leiðir til aukinnar eldsneytisnotkunar.
Kevin Magnussen á McLaren sagði að hann hefði þurft að spara ótrúlega mikið eldsneyti. Hann sagði „ég var hissa á að það væri egnginn að ná mér því ég þurfti að spara svo mikið eldsneyti, þetta var hálfgerður sunnudagsbíltúr.“
Force India liðið var sífellt að minna Sergio Perez á að spara eldsneyti. Hann var virkilega tæpur á að geta skilað einum lítra af eldsneyti til prófana eftir keppni.
Jenson Button á McLaren lýsti brautinni sem einni af bensínfrekustu brautunum á keppnisdagatalinu og sagði „Hún er á pari við Melbourne og Abu Dhabi, þar sem við erum tæpastir á eldsneyti.“

Heimamaðurinn ungi, Daniil Kvyat átti drauma tímatöku á laugardaginn. Hans besta í Formúlu 1. Hann ræsti fimmti, beint fyir framan Vladimir Putin, forseta Rússlands. Hins vega fór ræsingin ekki vel og hann tapaði mörgum sætum.
Rússinn endaði í 14. sæti, öruggt er að hann ætlaði sér meira en þetta. Hann hefur að minnsta kosti ætlað að ná í stigasæti. Ætli pressan hafi ekki hreinlega orðið honum ofviða.
„Hörmuleg ræsing,“ sagði heimamaðurinn um sína keppni en slök ræsing og mikil þörf til að spara eldsneyti skópu lélegan kappakstur hjá Kvyat.