Fyrirsæturnar mættu í teiti til Kate Moss

Það var mannmargt í verslun Topshop á Oxford-stræti í London í gær þegar nýrri línu fyrirsætunnar Kate Moss fyrir Topshop var fagnað.

Meðal gesta voru ofurfyrirsæturnar Cara Delevingne, Suki Waterhouse og Naomi Campbell en leikkonan Sienna Miller lét einnig sjá sig.

Þetta er fyrsta lína Kate fyrir Topshop í fjögur ár og myndaðist löng röð fyrir utan verslun Topshop á Oxford-stræti í gær þar sem æstir viðskiptavinir og aðdáendur fyrirsætunnar kepptust við að tryggja sér flíkur úr línunni.