Persónuvernd segir gagnaleka Vodafone lögbrot

Persónuvernd hefur úrskurðað í sjö málum um gagnalekann hjá Vodafone. Niðurstaðan mun vera sú að varðveisla Fjarskipta hf., eða Vodafone, á persónuupplýsingum, þar með talið sms-skeytum, sem sendu voru af vefsíðu fyrirtækisins og birt á netinu í kjölfar innbrots í tölvukerfi þess, samrýmdist ekki lögum um persónuvernd og meðferð persónuupplýsinga.

Persónuvernd birti úrskurðina á heimasíðu í dag. Um er að ræða þrjár tegundir af málum, sem alls voru sjö, í fyrsta lagi sms skeyti sem send voru af kvartanda sjálfum, í öðru lagi mál þar sem kvartandi var móttakandi slíkra sms skeyta og í þriðja lagi þar sem upplýsingar um annað en sms skeyti voru meðal þeirra gagna sem láku frá Vodafone, það er að segja upplýsingar um lykilorð, netföng, kennitölur og fleira.

Persónuvernd telur varðveislu þessara gagna ekki samrýmast lögum um Persónuvernd en Þórður Sveinsson, lögfræðingur hjá Persónuvernd, segir stofnunina ekki hafa tekið afstöðu til þess hvort öryggi hafi verið ábótavant hjá Vodafone, það sé á höndum Póst- og fjarskiptastofnunar að hafa eftirlit með slíku.

Eins og kunnugt er hakkaði tyrkneskur tölvuþrjótur sig inn á vef Vodafone um mánaðarmótin nóvember desember í fyrra, og náði í mjög viðkvæmar persónuupplýsingar um notendur fyrirtækisins. Hann birti svo upplýsingarnar á netinu, meðal annars persónuleg SMS á milli fólks og lykilorð af tölvupóstföngum.

Brot á lögum um persónuvernd geta varðar fésektum eða fangelsi allt að þremur árum. Sé brot framið í starfsemi lögaðila má gera lögaðilanum að greiða fésekt samkvæmt hegningarlögum.

Þórður segir Persónuvernd ekki sjá um að framfylgja refsingum við brotum á lögunum, slíkt sé í höndum lögreglu og dómstóla og því geta þolendur lekans þurft að höfða skaðabótamál á hendur Vodafone til að sækja skaðabætur. Greint hefur verið frá því að margir þeir sem urðu fyrir barðinu á lekanum hafi þegar leitað lögmanns og hyggjast sækja rétt sinn fyrir dómstólum.