Nico Rosberg á ráspól í Belgíu

Nico Rosberg á Mercedes plantaði sér á ráspól fyrir belgíska kappaksturinn sem fram fer á morgun. Lewis Hamilton varð annar og Sebastian Vettel þriðji.

Tímatakan hófst á mjög blautri braut eftir rigningu morgunsins. Það rigndi meira þegar leið á tímatökuna. Fyrirfram mátti búast við yfirburðum Mercedesliðsins. Stærsta spurningin var hvort einhver gæti komið á óvart eftir sumarfrí.

Ökumenn fóru varlega í byrjun fyrstu lotu til að kanna aðstæður og finna pollana á brautinni sem var greinilega mjög hál. Mikið var um að ökumenn færu vítt í beygjum og út fyrir braut sökum bleytu.

Í fyrstu lotunni duttu sex hægustu ökumennirnir út. Það voru, André Lotterer og Marcus Ericsson á Caterham, Esteban Gutierrez á Sauber, Nico Hulkenberg á Force India, Max Chilton á Marussia og Pastor Maldonado á Lotus.

Í annari lotu duttu út, Jules Bianchi á Marussia, Sergioa Perez á Force India, Romain Grosjean á Lotus, Adrian Sutil á Sauber og Toro Rosso ökumennirnir Daniil Kvyat og Jean-Eric Vergne.

Í þriðju lotunni kvartaði Lewis Hamilton sáran undan frambremsunum á bíl sínum. Hann sagði þær ekki virka almennilega. Hugsanlega útskýrir það muninn á honum og Rosberg í dag.

„Við erum með frábæran bíl, við leiðum og það er svo svalt að sjá liðið standa sig svona vel. Við eigum mjög góðan möguleika á morgun - og ég hlakka til morgundagsins,“ sagði Rosberg hæstánægður eftir góða tímatöku.

„Þetta var erfið tímataka. Lota 2 var erfið fyrir okkur, ég reyndi að vera áfram út á brautinni en þá byrjaði að rigna meira. Ég vildi spara dekkjagang fyrir þriðju lotuna. Mér tókst að lokum að bjarga mér upp úr annari lotu,“ sagði Vettel, sem hefði viljað enda ofar en hann sagði að bilið vera of stórt í Mercedes bílana.

„Ég var með ískalda bremsu vinstra megin að framan, svo bíllinn leitaði til hægri. Það var ekkert sem ég gat gert á úthringnum til að losna við þetta. Ég tapaði mikum tíma,“ sagði Hamilton. Hann var ekki að lenda í fyrstu bremsuvandamálunum á tímabilinu. 

Úrslit tímatökunnar fyrir belgíska kappaksturinn 2014:

1.Nico Rosberg - Mercedes

2.Lewis Hamilton - Mercedes

3.Sebastian Vettel - Red Bull

4.Fernando Alonso - Ferrari

5.Daniel Ricciardo - Red Bull

6.Valtteri Bottas - Williams

7.Kevin Magnussen - McLaren

8.Kimi Raikkonen - Ferrari

9.Felipe Massa - Williams

10.Jenson Button - McLaren

11.Daniil Kvyat - Toro Rosso

12.Jean-Eric Vergne - Toro Rosso

13.Sergio Perez - Force India

14.Adrian Sutil - Sauber

15.Romain Grosjean - Lotus

16.Jules Binachi - Marussia

17.Pastor Maldonado - Lotus

18.Nico Hulkenberg - Force India

19.Max Chilton - Marussia

20.Esteban Gutierrez - Sauber

21.André Lotterer - Caterham

22.Marcus Ericsson - Caterham

Keppnin verður í beinni útsendingu á Stöð 2 Sport á morgun og hefst útsendingin kl 11:30.