Bílskúrinn: Hverjum var um að kenna í Belgíu?

Belgíski kappaksturinn sem fram fór í gær var fyrir margt athyglisverður. Daniel Ricciardo vann sína þriðju keppni og Kimi Raikkonen náði sínum besta árangri á tímabilinu. Allra augu beinast þó að Mercedes þessa stundina. Hvað er að gerast þar? Verður liðið starfhæft á næstunni?

Þetta allt og meira til verður til umfjöllunar í Bílskúrnum, léttu hliðinni á Formúlu 1 hér á Vísi.

Hamilton hliðin

Eftir ljómandi ræsingu hefur Lewis Hamilton eflaust hugsað sér gott til glóðarinnar. Nú værir keppnin í hans höndum enda orðinn fremstur eftir að hafa ræst annar. Hann hefur þá verið of fljótur á sér.

Á öðrum hring ekur Nico Rosberg upp að hlið hans og gerir heiðarlega tilraun til að koamst fram út. Tilraun sem Hamilton verst vel. Afleiðingar varnarinnar eru þær að Rosberg þarf eiginlega að aka allur út af brautinni til að halda bíl sínum heilum. Hann endar á því að aka aftan á bíl Hamilton. Þá springur dekk á bíl Bretans. Hluti af framvæng Rosberg brotnar líka af.

Neyðarfundur var haldinn hjá Mercedes liðinu skömmu eftir keppnina. Hamilton kom út af þeim fundi og lét þessi orð falla „Hann (Rosberg) sagði að hann hefði gert þetta viljandi og að hann hefði getað forðast þetta atvik.“

„Hann kom inn á fundinn og sagði að þetta væri mér að kenna,“ sagði niðurlútur Hamilton eftir keppnina og fundinn.

Hamilton minntist líka á Mónakó í sínum fyrstu viðrögðum eftir keppnia. Hann vildi meina að aðstæðurnar væru svipaðar og þá.

Orðrómur er kominn á kreik um að Hamitlon vilji yfirgefa liðið. Það verður þó dregið í efa, sigurlöngun hans er sennilega meiri en svo að han leiti til annars liðs núna. Vissulega eru þó til þau lið sem myndi glöð taka við Lewis Hamilton.

Rosberg rökin

Rosberg hefur frá því strax eftir fundinn haldið því fram að um kakkapstursatvik sé að ræða, eitthvað sem getur bara gerst í keppni.

„Sem ökumenn erum við hér til að skemmta áhorfendum, okkar viðureignir á brautinni eru alltaf á ystu nöf. Mér þykir leitt að við snertumst, en ég sé þetta sem kappakstursatvik. - dómarar keppninnar voru á sama máli. Ég var hraðari á beina kaflanum og tók ytri línuna þar sem innri línan var upptekin,“ sagði Rosberg sem hjómaði viss í sinni sök, ef hún er þá einhver.

„Nico fannst hann þurfa að halda sinni línu. Hann þurfti að gera það til að ná sínu fram gegn Lewis og hvað Lewis varðar fannst honum það alls ekki vera sitt að gefa Nico pláss,“ sagði Toto Wolff keppnisstjóri Mercedes eftir fundinn.

„Þeir (Hamilton og Rosberg) voru sammála um að vera ósammála í mjög heitum samræðum okkar á milli, en þetta var ekki viljandi ákeyrsla. Það er af og frá,“ bætti Wolff við um fundinn og atvikið.

Toto Wolff gaf svo út að Rosberg yrði þrátt fyrir allt refsað fyrir atvikið. Vísir mun fylgjast með málinu áfram.

Maður dagsins

Titillinn maður dagsins verður ekki tekinn af Daniel Ricciardo, hann ók eins og hann ætti lífið að leysa. Honum tókst að standa á efsta þrepinu á verðlaunapallinum í þriðja sinn á sínum ferli. Allir hans sigrar í Formúlu 1 hafa komið á þessu ári. Nánar tiltekið í síðustu sex keppnum hefur Ricciardo unnið þrjár. Árið 2014 er það aðdáunarvert fyrir ökumann sem ekki ekur Mercedes bíl.

„Ég trúi þessu eiginlega ekki. Þetta er aftur súrrealískt, sérstaklega þar sem þetta er Spa. Það sögðu margir, þú átt ekki möguleika hér en ég held að við höfum sýnt að við höfum góðan hraða og það kemur okkur talsvert á óvart,“ sagði hinn sí brosandi Ricciardo, sem er að verða einn vinsælasti ökumaðurinn í Formúlu 1.

Kimi og fjórða sætið

Kimi Raikkonen hefur átt erfitt tímabil hingað til. Hans besti árangur í keppni fyrir þá belgísku var sjötta sæti í keppninni í Ungverjalandi og hann hefur tvisvar landað 7 sæti.

Belgía gekk betur og var Kimi Raikkonen líklegur á verðlaunapall framan af. Það var þó ekki alveg raunin en fjórða sætið varð hans hlutskipti á Spa brautinni í ár.

Það er vert að nefna að þessi árangur Raikkonen er einnig merkilegur fyrir þær sakir að í fyrsta skipti á tímabilinu lauk hann keppni ofar en liðsfélagi sinn, Fernando Alonso.

„Ég held að þetta sé fyrsta keppnin í ár sem er vandræðalaus, við vorum ekki í vandræðum með bílinn eða að glíma við nein önnur vandræði og við gátum ekið okkar eigin keppni. Hraðinn var ekki slæmur en þetta er samt ekki nógu gott. Ég held að við verðskuldum ekki meira. Ef við eigu meira skilið þá endum við framar,“ sagði Raikkonen sem var óvenju málglaður eftir keppnina, enda sennilega bara frekar glaður yfir höfuð.

Refsingar í Belgíu

Kevin Magnussen á McLaren fékk 20 sekúndna refsingu eftir að hafa þvingað Fernando Alonso út af brautinni á lokaandartökum keppninnar þegar Alonso reyndi að komast fram úr danska ökumanninum.

Alonso hafði sjálfur fengið refsingu fyrr í keppninni sem hann taldi hafa bundið enda á vonir sínar um verðlaunasæti.

„Í ræsingunni lentum við í vandræðum með rafkerfið í bílnum. Ég held að við höfum þurft að skipta um rafgeymi á síðustu mínútunum fyrir keppni til að geta ræst bílinn,“ sagði Alonso. Vélvirkjar á hans vegum voru á brautinni eftir að allir voru beðnir um að víkja af henni svo ökumenn gætu hafið upphitunarhring.

Alonso fékk svo fimm sekúndna refsingu. Hann þurfti að vera stopp á þjónustusvæðinu í fimm sekúndur áður en Ferrari liðið mátti þjónusta bíl hans í fyrsta þjónusuthléinu.

„Án refsingarinnar hefði ég komið út á undan Bottas sem varð þriðji. Ég hefði getað barist um þriðja sætið við hann,“ sagði Alonso sem var almennt sáttur við Ferrari fákinn þessa helgina.