Manchester United sigraði Liverpool með þremur mörkum gegn einu í úrslitaleik Champions Cup í nótt. Leikið var á Sun Life Stadium í Miami, Flórída.
Allt það helsta úr leiknum má sjá í spilaranum hér að ofan.
Liverpool leiddi í leikhléi með marki Steven Gerrard úr vítaspyrnu sem dæmd var eftir að Phil Jones braut á Raheem Sterling innan vítateigs. Þetta var þriðja markið sem United fékk á sig úr vítaspyrnum á mótinu.
United-menn mættu ákveðnari til leiks í seinni hálfleik og á 55. mínútu jafnaði Wayne Rooney metin eftir fyrirgjöf frá Javier Hernandez.
Aðeins tveimur mínútum seinna kom Juan Mata United yfir með skoti sem fór í Mamadou Sakho og framhjá Simon Mignolet í marki Liverpool.
Það var síðan varamaðurinn Jesse Lingard sem gulltryggði sigurinn tveimur mínútum fyrir leikslok með góðu skoti rétt fyrir utan vítateig eftir fyrirgjöf Ashley Young.
Fleiri urðu mörkin ekki og United fagnaði 3-1 sigri og um leið sigri á Champions Cup. Lærisveinar Louis van Gaal fengu bikar og eina milljón dollara í verðlaunafé fyrir sigurinn.
Þá var Wayne Rooney valinn besti leikmaður mótsins í leikslok.
Manchester United mætir Valencia í síðasta æfingaleik sínum fyrir átökin í ensku úrvalsdeildinni, á meðan Liverpool mætir Borussia Dortmund.
Byrjunarlið Manchester United var þannig skipað:
David De Gea; Phil Jones, Chris Smalling, Jonny Evans; Antonio Valencia (8. Luke Shaw), Darren Fletcher (46. Tom Cleverley), Ander Herrera (79. Jesse Lingaard), Ashley Young; Juan Mata (69. Shinji Kagawa); Wayne Rooney, Javier Hernandez (69. Nani).
Byrjunarlið Liverpool var þannig skipað:
Simon Mignolet; Martin Kelly, Martin Skrtel, Mamadou Sakho (74. Kolo Toure), Glen Johnson; Jordan Henderson, Steven Gerrard (63. Lucas), Joe Allen (63. Emre Can); Coutinho (77. Kristoffer Peterson), Rickie Lambert (63. Jordan Ibe), Raheem Sterling.
