Barnakórar, Passíusálmar og nýtt íslenskt tónverk verður frumflutt

Söngvahátíð barnanna verður haldin í Hallgrímskirkju í dag klukkan 17. Eins og undanfarin ár munu um 100 börn úr sex kórum af höfuðborgarsvæðinu syngja ásamt Lögreglukórnum í Reykjavík og djasshljómsveit. Sérstakir gestir tónleikanna eru söngvararnir Auður Guðjohnsen og Egill Ólafsson og stjórnandi Tómas Guðni Eggertsson. „Megináherslan á þessum tónleikum er á sex nýja íslenska sálma sem voru sérpantaðir af tónmenntasjóði kirkjunnar og frumfluttir á Menningarnótt í ágúst síðastliðnum,“ segir Tómas. „Við höfum í gegnum árin notið mikillar velvildar frá Agli Ólafssyni og hann verður einnig með okkur í ár. Á meira að segja einn af sálmunum sem við syngjum.“



Tónleikarnir eru um einnar klukkustundar langir og er aðgangur ókeypis.

Á morgun, föstudaginn langa, verður í kirkjunni heildarflutningur á Passíusálmum Hallgríms Péturssonar. Lesið verður frá klukkan 13 til 18 og er aðgangur ókeypis.

Umsjón með lestrinum hafa Ævar Kjartansson og dr. Þórunn Sigurðardóttir. Björn Steinar Sólbergsson, organisti Hallgrímskirkju, leikur orgelverk milli lestra.



Á mánudaginn efnir Listvinafélagið í fyrsta sinn til páskatónleika á annan í páskum og hefjast þeir klukkan 20. Frumflutt verður verk eftir Hreiðar Inga Þorsteinsson, sem samið er sérstaklega í tilefni af Hallgrímsárinu, Páskakantata Hallgríms fyrir kammerkór, einsöngvara og orgel. Flytjendur eru kammerkórinn Schola cantorum og einsöngvarar úr þeirra hópi ásamt Birni Steinari Sólbergssyni orgelleikara. Gestastjórnandi er Hreiðar Ingi Þorsteinsson.