Hreiðar Már Sigurðsson, fyrrverandi forstjóri Kaupþings, segir að samskipti sín við starfsmenn eigin viðskipta bankans hafi verið mjög lítil. Hann segist hvorki hafa komið nálægt því hversu mikið eigin viðskipti keyptu af hlutabréfum Kaupþings né á hvaða gengi bankinn keypti bréfin.
Hreiðar er ákærður fyrir markaðsmisnotkun, ásamt öðrum fyrrverandi starfsmönnum og stjórnendum Kaupþings, en starfsmenn eigin viðskipta eiga að hafa keypt mikið magn af hlutabréfum í bankanum að undirlagi Hreiðars, og annarra, með það að markmiði að halda bréfi verðanna uppi.
Eitt heildarsvar frá Hreiðari
Björn Þorvaldsson, saksóknari, spyr Hreiðar nú út í ákæruatriðin. Á meðal þeirra gagna sem hann hefur borið undir hann eru töflur úr ákæru sem sýna viðskipti deildar eigin viðskipta í Kaupþingi með hlutabréf í Kaupþingi á hverjum degi á ákærutímabilinu 1. nóvember 2007-8. október 2008.
Kvaðst Hreiðar ekkert hafa kynnt þær tölur sem koma fram í töflunum og hann gæti því ekki tjáð sig um þær. Dómsformaður, Arngrímur Ísberg, sagði þá að það þyrfti ekki að spyrja hann út úr hverjum degi þar sem saksóknari fengi alltaf sama svarið. Ákærði væri í raun búinn að svara þessu með einu heildarsvari.
„Mér finnst nú skrýtið að ákærði sé ekki búinn að kynna sér það sem kemur fram í ákæru. Ég er bara að spyrja hann út í ákæruatriðin,” sagði saksóknari þá.
Arngrímur sagði að engin ástæða væri til að spyrja út í hvern dag fyrir sig þar sem eitt heildarsvar væri komið.
„Nú, ef að dómari telur það fullnægjandi...” sagði Björn.
„Það kemur bara fram í dómnum hvað dómari telur fullnægjandi,” svaraði Arngrímur.
Ósmekklegasta spurningin
Saksóknari ákvað þá að spyrja Hreiðar út í töflur sem sýna öll viðskipti eigin viðskipta með hlutabréf Kaupþings og svaraði forstjórinn hverri spurningu á eina leið: „Ég hef ekki kynnt mér þessar tölur og get ekki gefið álit mitt á þeim.”
Hreiðar var einnig spurður út í tap Kaupþings með viðskipti í eigin bréfum sem nam 6,3 milljörðum. Hreiðar kvaðst ekki muna sérstaklega eftir umræðu um tapið. Saksóknari spurði þá hvort að tapið hafi verið lítill fórnarkostnaður í stóra samhenginu.
„Þetta er ósmekklegasta spurning sem ég hef fengið,” svaraði Hreiðar.
Björn dró þá spurninguna til baka en Hreiðar lét áfram í sér heyra: „Hvers konar rugl er þetta? Á ég að fara að svara með svona skætingi?”
Dómsformaður áréttaði þá að spurningin hefði verið dregin til baka og fór saksóknari í næstu spurningu.
