Ofstækismenn vilja í nýtt hof Ásatrúarfélagsins

Bygging hofs Ásatrúarfélagsins við Menntasveig í Öskjuhlíð er komin á fullt skrið. Hofið mun opna seinni hluta næsta árs, líklega í tæka tíð fyrir veturnáttablót, Allsherjargoði Hilmar Örn Hilmarsson segir Ásatrúarfélagið hafa sætt gagnrýni fyrir umburðarlyndi sitt og afstöðu til samkynhneigðra. Hilmari hafa borist fregnir af hópum sem ætla að vitja hofsins og helga það á sinn hátt svo hægt sé að leiðrétta rangar áherslur frjálslyndra Íslendinga.

Nú ræða félagsmenn í þessu samhengi hvort leyfa eigi óheftan aðgang, eða hvort eigi að hafa skipulagðar kynningar fyrir ferðamenn. „Við höfum því miður fengið hatursgusur að utan fyrir það til að mynda að við höfum látið málefni samkynhneigðra okkur varða og börðumst lengi fyrir þeim rétti að fá að gefa saman samkynhneigð pör. Ég held að við séum ákveðinn endurómur af íslensku samfélagi. Þjóðin hefur staðið með okkur í gegnum þykkt og þunnt,“ segir Hilmar og segist vilja halda í umburðarlyndið.

„Við þekkjum þessa texta, við höfum lifað með þessum textum í eitt þúsund ár. Við erum ekkert að hjúpa þetta með einhverri víkinga og bardaga rómantík. Við erum ekki að velta okkur upp úr einhverjum fornum siðbótarritum frá árinu 70 eins og margir þessir erlendu ásatrúarmenn sem líta á þá sem einhverja grunnheimild um iðkun þessa forna siðar.“