Lögreglan í Köln í Þýskalandi hefur borið kennsl á þrjátíu og einn einstakling sem grunaður er um að hafa framið glæpi í borginni á nýársnótt. Átján þeirra eru hælisleitendur, að því er segir í frétt BBC. Enginn hefur verið handtekinn í tenglum við meint kynferðisbrot.
Lögregluyfirvöld í Köln hafa sætt mikilli gagnrýni í tengslum við árásir og kynferðisbrot í borginni á gamlárskvöld. Á annað hundrað kærur hafa verið lagðar fram, þar af 117 vegna kynferðisbrota. Vitni segja árásarmennina líta út fyrir að vera frá Norður-Afríku eða Miðausturlöndum, en lögregla segir tuttugu og einn undir grun vegna kynferðisbrota.
Lögreglan hefur viðurkennt að mistök hafi verið gerð – aðstæður hafi verið vanmetnar og viðbúnaður lögreglu þetta kvöld hafi ekki verið nægur. Fullyrt hefur verið að séð verði til þess að slík mistök endurtaki sig ekki þegar mikill mannfjöldi er saman kominn í miðbænum.
Að sögn talsmanns innanríkisráðuneytisins eru flestir hinna grunuðu sakaðir um þjófnað og líkamsárásir. Átján þeirra hafi sótt um hæli í Þýskalandi, en þeir koma frá átta löndum.
Yfirlýsingar lögreglu um að árásarmennirnir séu líklega af norðurafrískum eða arabískum uppruna hafa kynt undir hatursorðræðu gegn flóttafólki, innflytjendum og útlendingum almennt, einkum aröbum og múslimum. Þá hefur flóttamannastefna Þýskalands verið gagnrýnd harðlega að undanförnu.
Hundruð manna hafa mótmælt fyrir utan aðallestarstöðina, þar sem brotin voru framin, að undanförnu.
Enginn verið handtekinn í tengslum við kynferðisbrotin í Köln
Tengdar fréttir
Handteknir í Þýskalandi grunaðir um að hópnauðga unglingsstúlkum
Þrír Sýrlendingar hafa verið handteknir í smábænum Weil am Rhein í Suður-Þýskalandi grunaðir um að hafa hópnauðgað tveimur unglingsstúlkum á nýársnótt.
Íslendingur í Köln: „Fór heim þegar ég sá ástandið magnast upp“
Heiðrún Arnardóttir býr og starfar í Köln og varð vitni að því ófremdarástandi sem skapaðist í miðborginni á gamlárskvöld.
Árásirnar í Köln: Lögreglan þarf að endurskoða starfsaðferðir sínar
Ralf Jaeger, innanríkisráðherra í þýska sambandslandinu Norður-Rín og Vestfalíu, segir að lögreglan verði að tryggja að það ofbeldi sem konur urðu fyrir í Köln á nýársnótt, og fleiri þýskum borgum, endurtaki sig ekki.
Ofbeldi gegn konum í Köln vekur mikla reiði
Lögreglan í Köln hefur viðurkennt margvísleg mistök í tengslum við kynferðisofbeldi sem tugir kvenna urðu fyrir á gamlársdag. Innanríkisráðherra Þýskalands krefst skýringa. Lögreglustjórinn segist ekki ætla að segja af sér.
Lögreglan í Köln réði ekki við ástandið
Í skýrsla lögreglunnar í Köln um árásirnar á nýársnótt segir að lögregluþjónar hafi ekki ráðið við ástandið sem skapaðist, svo mikið var um að vera.
