Nýársspá Siggu Kling – Ljón: Eins og þú hafir unnið í happdrætti

Elsku, elsku ljónið mitt. Það væri nú ekki mikið fjör á þessari jörð ef þú værir ekki til því þú skreytir lífið með karakter sem enginn gleymir.

Þú þarft að vita það að enginn verður mikilmenni án þess að glíma við erfiðleika eða eiga fortíð og þú, gullið mitt, ert að fara inn í ár tækifæranna. Árið gæti byrjað rólega og þér jafnvel fundist eins og ekkert sé að gerast fyrripartinn í janúar en svo byrjar sko ballið!

Þú munt þurfa að hugsa hratt og taka ákvarðanir eins og vindurinn. Það eru miklir möguleikar á flutningum og það gæti átt við um heimili, vinnu eða skóla.

Gleði og ánægja einkenna sumarið og haustið, það er hreinlega eins og þetta ár gefi happdrættisvinning og þú munt sjá það best í haust.

Ástin blómstrar hjá trygglyndum ljónunum, þegar þú ert búið að ákveða að einhver sé makinn þinn þá nennir þú alls ekki að skipta um elskhuga svo þú berst eins og ljóni sæmir fyrir ástinni og ástin þín er svo sannarlega sönn, elsku ljónið mitt.

Þú þarft ekki að kvíða einhverju illu umtali, það er bara talað um fólk sem er eitthvað spennandi og það ert þú svo sannarlega. Mundu að það er aldrei sparkað í þann sem ekkert hefur til að bera. Þegar þú skilur að margbreytileiki þinn er náðargáfa þá nærð þú tökum á þínum miklu tilfinningum því þú ert með hjarta úr gulli og vilt öllum vel.

Þú ert búin að vinna þér inn stóra innistæðu í karmabankanum því síðustu misseri eru búin að vera eins og þú hafir haft veröldina á herðum þér. Þetta ár gerir þig ennþá sterkari svo þér finnst bara létt að bera blessaða veröldina.

Gleðilegt ár, elsku ljónið mitt! Þín, Sigga Kling

Fræg ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari Agent Fresco.